Kolektor human tulisa, gipusil patay

CEBU, Philippines - Namatay ang kolektor sa usa ka furniture firm nga naglakaw  dihang  gitulis  kini  ug  gipusil sa  duha ka wala hiilhing   armado nga  tawo  nga  mitulis  kaniya   didto  sa  Purok Caimito, sa barangay  Canjulao, dakbayan  sa Lapulapu  sa miaging  gabii.

Ang   biktima mao si Ricardo Bacaling, 45, minyo nga lumad nga taga Placer, Lanao del Norte nga nagtrabaho isip kolektor sa Cecile Enterprise sa Lapulapu.

Si PO3 Lydo Pinos sa homicide section sa kapolisan sa maong dakbayan nga nahinabi sa Banat News miingon nga padulong  na   nga  mopauli sa ilang  balay  ang  biktima   kuyog sa 8 anyos nga anak niini.

Apan  matud  pa  ni PO3 Pinos  nga  sa paghiabot  niini   sa ngitngit nga bahin sa maong dalan   nasugatan  niini  ang  duha ka lalaki.

Dihadiha  kalit  nga gilabni ang gibitbit niyang  cell phone ug  human  kini  makuha,   gipusil  usab sa laing kauban  ang  biktima   hinungdan  sa hinanaling  kamatayon  niini.

Matud pa ni PO3 Pinos nga usa sa mga tulisan nailhan  nga mao si Walter Berame alyas Yung, kinsa dali usab   nga nangikyas pahilayo sa maong dapit.

Ang biktima nga  samdan  sa iyang ulo ug uban pang bahin sa lawas dali nga gihatod sa mga silingan ngadto sa Lapulapu City Hospital apan gideklarar kini sa mga doktor nga dead on arrival. Si PO3 Lydo miingon nga sila si PO2 John Carlo Jocotan ug PO2 Jesson Alparito nga kauban nila sa homicide section   misusi  didto  sa crime scene  ug   napunitan  niini  ang  upat ka  kabhang sa kalibre 9 mm pistol ug duha ka nangalumping na  nga bala sa maong  armas.

Matud pa ni PO3 Lydo nga ang asawa  nga ilang gisukitsukit sa pagkatawo sa namatay miingon nga wala kini makamatikod nga   may  kontra  ang  iyang  bana  tungod kay mahigalaon  kini sa ilang mga silingan.

Dugang pa niya nga ang 8 anyos nga anak sa biktima nga nakakita sa maong hitabo kasamtangan  nilang gibutang sa kustodiya sa buhatan sa Department of Social Welfare and Services. (/WC) (BANAT NEWS)