Duha ka tawo naghikog

CEBU, Philippines - Patay nang napalgan kagahapon sa buntag diha sulod sa ilang balay sa sitio Acacia, barangay Jaclupan, dakbayan sa Talisay ang usa ka 27-anyos nga lalaki kinsa giingong naghikog pinaagi sa paghigot sa ilang liog gamit ang Abaka nga pisi.

 Ang namatay mao si Paul Dominic Estasane, ulitawo ug residente sa maong dapit gituohang naghikog tungod sa selos ngadto sa iyang uyab.

Sa imbestigasyon ni PO3 Benedicto Lasque nagkaaway kini ug sa upat ka tuig nang uyab nga si Mary Jane De los Reyes, 26, niadtong Huwebes sa gabii tungod sa selos.

Gawas niini giingong si De los Reyes wala kini mauyoni sa inahan ni Estasane ug buot kining pabuwagan.

Mga alas 9:00 sa gabii niadtong Huwebes si Estasane mipauli kini ngadto sa ilang balay ug mga alas 10:00 sa gabii mibalik kini sa balay ni De los Reyes apan giingong natulog na ang babaye hinungdan nga mibalik og pauli sa ilang balay si Estasane ug giingong nag-inom kini.

Apan kagahapon sa mga alas 7:00 sa buntag napalgan na kining nagbitay nga dunay higot nga pisi sa liog nga wala nay kinabuhi diha sulod sa ilang balay.

Samtang laing naghikog gamit ang pisi nga nylon ug nagdunggab pa gyud sa iyang dughan ang napalgan kagahapon sa hapon diha sa giabangang balay sa  sitio Eskuwelahan sa barangay Basak, dakbayan sa Lapulapu.

Si PO2 Jersson Alparito sa Homicide Section sa kapolisan sa maong dakbayan miila sa namatay nga mao si Marlon Manog, 31, taga dakbayan sa Davao apan nagpuyo sa maong dapit. Matud pa ni Alparito dunay dakong problema si Manog tungod kay giingong nawala ang mga importanteng dokumento sa iyang gitrabahoang construction firm.

Gisusi pa sa mga imbestigador kung giunsa niya pagdunggab sa iyang dughan ug ingon man sa pagbitik sa iyang liog sa samang higayon nga maoy nakaingon sa iyang hinanaling kamatayon. (BANAT NEWS)