Mga botika ng barangay nabangkarota
CEBU, Philippines - Dili na mohatag pa og lisensya ug motabang ang Department of Health sa mga Botika nang Barangay (BNB) nga nanirado tungod sa pagkabangkarota.
Kini human si Dr. Thelma Fernandez, section chief sa health facilities sa Department of Health (DOH)7 mibutyag sa Banat News nga ang mga nabangkarotang BNB resulta sa pag-abuso sa mga lokal nga mga opisyal.
Sa pagsugod sa BNB sa milabay’ng administrasyon, ang DOH-7 nakatukod og 621 ka outlets sa nagkadaiyang barangay, apan karon 423 na lang kini sa tibuok Central Visayas.
Dinhi sa Sugbu adunay 219 ka BNB, 151 sa Bohol, 50 sa Negros Oriental, ug tulo sa Siquijor.
Ang BNB nagbaligya og mga generic medicines nga barato ug susama ra kaepektibo sa mga branded nga tambal alang sa mga kabus nga mga taga barangay.
Apan matud pang Fernandez tungod sa pag-abuso ug wala pagpakabana sa mga barangay officials nag-anam og kahilis ang nahisgutang mga botika sa kagamhanan.
Sumala pa nga dunay mga barangay officials lakip na ang mga kapitan ang magsige og kuha og tambal sa mga BNB nga wala gyud mamayad maong wala na makatuyok pa ang P25 mil nga puhonang gipahuwam sa DOH.
Dihang gisubay, sinaw pa sa simod sa itoy ang sudlanan sa halin sa maong mga botika tungod kay nahurot ang mga tambal nga way halin, kini maoy hinungdan nga di na mohatag pa og dugang lisensya ang DOH aron magtukod og lain pang BNB. (BANAT NEWS)
- Latest
