17-anyos nga hubog nagmaneho nadisgrasya patay

CEBU, Philippines - Patay diha-diha ang usa ka menor de edad nga nagmaneho sa iyang motorsiklo nga gikataho nga hubog samtang naangol ang angkas niini human madisrasya sa kurbadahong bahin sa sitio Saksak, barangay Sandayong sa lungsod sa Tuburan sa miaging adlaw.

Ang namatay mao si Stephen Jose Jose Hoban, 17-anyos, lumulupyo sa barangay Calangahan sa lungsod sa Tuburan. Naangol usab si Dionesio Andrade Cose, lumulupyo sa maong dapit.

Matud pa ni PO1 Joseph Bejer nga nahinabi sa Banat News nga hubog nga nagmaneho ang biktima sa iyang motor pauli sa ilang balay gikan sa sentro sa lungsod.

Giingong duna kini gikalumba nga laing motor apan pag-abot sa nahitaboan misaliring kini human mawad-i og kontrol sa manobela.Ang duha gidala saTuburan District Hospital apan gideklarar si Hoban nga patay samtang gidala usab si Cose sa Vicente Sotto Memorial Medical Center. (BANAT NEWS)