BOC problemado karon og bodega

CEBU, Philippines - Nagkaproblema karon ang Bureau of Customs sa Sugbo kun asa ibutang ang nasakmit nilang mga sakyanan ug uban pang mga smuggled goods sa higayon nga papahawaon na sila sa ilang buhatan.        

Sumala pa ni Customs Police Commander Camilo Cascolan sa Enforcement Security and Safety sa Bureau of Customs Cebu kinahanglan og dako nga lugar ang ilang buhatan aron balhinan sa mga nasakmit nga mga smuggled items.

Siya nipasabot nga gikinahanglan usab nga mahibaw-an nila ang maong luna sa labing daling panahon aron makahinayhinay sila sa pagbalhin sa maong mga butang. Kini aron maplanohan usab nila ang hugot nga seguridad ug mabantayan pag-ayo ang maong mga smuggled goods.

Nasayran nga hangtud karon wala pa matino kun asa balhin ang buhatan sa Bureau of Customs human sila gipalayas sa Cebu Port Authority kon CPA. Hinuon niadtong Lunes, si Cebu Customs District Collector Edward Dela Cuesta nipahibawo nga gihatagan sila og unom ka bulan nga lugway nga pagpabilin una sa maong lugar. (BANAT NEWS)