134 ka mayor ug gobernador giluwata’g pahimangno

CEBU, Philippines - Ang Department of Environment and Natural Resources sa Central Visayas (DENR-7) ug  ang Mines and Geosciences Bureau  (MGB-7) miluwat og bag-ong mga pahimangno   bahin  sa pagdahili sa yuta ug  pagbaha ngadto sa 134 ka bag-ong napili ug napili pagbalik nga mga mayor sa syudad ug kalungsoran, ingon  man  sa  mga  gobernador sa upat ka probinsya sa rehiyon 7.

Matud pa ni MGB-7 Regional Executive Director Loreto B. Alburo nga ila nang gipadala ang maong mga geohazard advisories ngadto sa mga Local Chief Executives (LCE) sa Central Visayas aron makapamilyar sila bahin sa  geohazard mapping ug usab assessment program.

Dugang pa ni Alburo nga ang mga Local Government Units (LGU’s)  gihatagan  og kopya  sa maong resulta sa assessment aron ila  kining  matun-an  ug  makarekomendar sila  sa mga gikinahanglan  sa ilang opisina.

Bisan  si  DENR 7  Regional Executive Director  Isabelo Montejo  nagkanayon  nga  unsa  man  ang  mga  rekomendasyon  kinahanglang  kahatagan  dayon   og  pagtagad aron  maprotihian  ang  kinabuhi  ug  kabtangan.

Gibutyag ni Montejo nga dili unta magpasagad ang mga LGUs   bahin sa  gihatag sa MGB-7 nga  giya ilabi  na  sa  mga dapit  nga dali rang maapektohan sa mga pagbaha ug pagdahili sa yuta.

Samtang gitug-an ni Alburo nga adunay upat ka managlahi  nga team ang miapud-apod sa summary sa 1:50,000 –scale assessment o ang may pagka- detalyado na nga 1:10,000 scale ug lakip na ang geohazard maps ngadto sa upat ka probinsya sa Central Visayas. (BANAT NEWS)