Duha ka patrol car ihatag ngadto sa kapolisan sa Talisay

CEBU, Philippines - Ang kagamhanan sa dakbayan sa Talisay gitakdang motugyan sa duha ka mga bag-ong patrol car ngadto sa kapolisan sa siyudad. Si Talisay City Councilor Danny Caballero chairman sa committee on police mibutyag nga  sa umaabot nga Lunes duha ka mga Innova Patrol car ang ilang itugyan ngadto sa Talisay City Police Station.

Matud ni Caballero nga nakita nila ang dugang panginahanglan sa mga sakyanan sa kapolisan sa siyudad alang sa ilang matag adlaw nga operasyon ilabi na sa pagpatrolya  sa kadalanan ug pagtubag sa mga alarma.

Sa pagkakaron ang Talisay City Police Station adunay  duha  lang  ka  patrol car nga maoy gigamit nila sa pagpatrolya  sa kadalanan ug pag-alarma sa mga insidente.

Gawas sa nahisgutang duha ka Innova Patrol car ang siyudad mipalit usab og laing sakyanan nga 4X4 Hilux nga himuong service sa mayor. Sa umaabot  nga  Lunes  itugyan  usab sa siyudad ang maong sakyanan ngadto sa mayor.

Matud sa konsehal nga ang budget sa pagpalit sa nahisgutang tulo ka sakyanan gikan sa kagamhanan sa Talisay.  

Gibutyag ni Caballero nga nangayo pa sila og laing tulo ka mga patrol car  kang Department of Interior and Local Government Secretary Mar Roxas.

Dugang ni Caballero nga gawas sa mga sakyanan nangayo usab sila og 20 ka mga handheld radio  kang Senador Tito Sotto.

Ang maong mga handheld radio ihatag usab unya kini ngadto sa kapolisan sa siyudad.

Sa laing bahin, si Superintendent Resty Santos, officer-in-charge sa TCPS nagkanayon nga daku kaayo ang iyang pasalamat sa gihatag nga tabang ngadto kanila sa kagamhanan sa siyudad. Ang OIC mapasalamaton usab  sa ilang provincial headquarter tungod kay niining ulahi lang gihatagan  usab sila og tulo ka motorsiklo. (BANAT NEWS)