Polis gireklamo diha sa Ombuds Tungod sa pagkulata og babaye

CEBU, Philippines - Usa ka polis sa Mandaue City Police Office ang gireklamo kagahapon sa usa ka inahan diha sa Office of the Ombudsman-Visayas  tungod sa giingong pagkulata niini sa iyang anak nga babaye. Si Irene Sitinta, 68, nagkanayon nga ang iyang anak nga si Else Narido, 45, gikulata ni SPO1 Terson Plaña sakop sa Police Station 6 sa MCPO niadtong Agosto 25, 2013.

Matud niya nga mangayo siya og hustisya sa gidangatan sa iyang anak nga karon naglisod na og lakaw tungod sa gibuhat sa maong polis. Si Nonoy Hirarman, usa sa mga kuyog ni Sitinta didto sa Office of the Ombudsman kagahapon nagkanayon nga si Narido gi-pick up ni Plaña niadtong Agosto 25 sa ala 1:23 sa hapon. Boluntaryong mikuyog si Narido ug gidala kini sa balay sa iyang amo nga si Lydia Mayol. Si Narido katabang sa maong pamilya sulod na sa 18 ka tuig. Apan giingong pag-abot didto gipasanginlan siyang nangawat sa singsing sa iyang agalon. Sumala pa ni Hirarman, si Narido mitug-an nga nakapunit siya og singsing samtang nanglimpyo sa balay ni Mayol apan dihang iyang gipangita ang iyang amo aron iuli ang singsing nakalakaw na kini.

Giklaro sa inahan nga walay planong kawaton sa iyang anak ang maong singsing ug gani iuli unta niya kini sa iyang amo nianang pagkabuntag atol sa iyang pagsulod sa trabaho.

Apan naunhan siya sa pag-abot sa polis nga mi-pickup kaniya ug midala kaniya sa balay sa iyang agalon  ug  matud pa didto gikulata ni Plaña si Narido hinungdan nga naglisud na kini karon molakaw. Si Narido gitanggong karon sa usa sa mga police station sa Mandaue City Police Office tungod sa kasong qualified theft. “Okay ra kung dakpon nganong kailangan man gyud na bun-ogon. Pagpa-blotter namo sa maong kaso, si Else naglisod gyud og lakaw. Sa akong pag-imbestiga akung nasuta nga gibali-bali siya’g tamparos then gipatiran sa right part sa iyang body dapit sa gusok,” matud pa ni Hirarman. Ang Banat News misuway sa pagkuha sa habig ni Plaña apan napakyas ang maong tinguha. (/EIM) (BANAT NEWS)