Namatay ilawom sa atabay
CEBU, Philippines - Patay ang usa ka 60- anyos nga lalaki human kini namatay sa sulod sa atabay nga iyang giayo kagahapon sa alas-8 sa buntag sa Sitio Dakit Brgy. Kabituonan sa Toledo City.
Ang biktima naila nga si Pepe Dakay, 60, presidente sa Toledo City Tricycle Association ug usa ka tubero nga nagpuyo sa sitio Looc, Bato, Toledo City.
Si SPO4 Carmelito Hornales sa Toledo Police Station sa pakighinabi sa Banat News nagkanayon nga ang biktima misulod sa tabay nga gibanabanang may gilawmon nga 30- metros gikan sa ibabaw aron sa pag –ayo sa koneksyon sa tubo sa ilawom niini.
Ang atabay gipanag-iya ni Fernando Ricaplaza apan sa pag-abot niini sa tubig nga bahin misyagit kini ug nangayo og tabang kang Ricaplaza.
Giingon nga naglisod na ang biktima sa pagginhawa tungod sa gilawmon sa maong tabay apan wala kini matabang dayon hinungdan nga nakabsan kini sa kinabuhi.
Pasado alas-5 na sa hapon giingong nakuha ang iyang patay’ng lawas sa mga sakop sa Bureau of Fire Protection nga mi-rappel sa ilawom ug gihiktan og pisi ang iyang lawas.
Dugang pa ni SPO4 Hornales nga bisan patay na ang maong biktima gidala gihapon kini sa Toledo District Hospital aron kini opisyal nga madeklarar.
Gidudahan nga naglisod na sa pagginhawa sa ilawom ang biktima nga maoy nakaingon sa iyang kamatayon. (/EIM) (BANAT NEWS)
- Latest
