Sunog sa Tambuli P80 mil ang danyos

CEBU, Philippines - Mikabat  sa P80 mil ang  danyos  nga  gibilin  sa  usa ka sunog  nga  miulbo sa lobby sa Tambuli West  Beach Resort  sa barangay  Maribago, dakbayan  sa Lapulapu  sa miaging  kaadlawon.

Si FO1 Jennifer Letchido sa kabomberohan  sa Lapulapu nga nahinabi sa Banat News miingon  nga  wala  pa nila  masuta  pag-ayo  ang  sinugdanan  sa maong  kayo.

Matud pa ni FO1 Letchido nga unang  nakatubag  ang  ilang substation sa barangay Marigondon   ug    dali  kining  gipaubos   sa second alarm ni Lapulapu City Fire Marshall Oscar Mayol.

Gibanabana  nga  mikabat  sa   P80,000 nga danyos sa maong  sunog.

Hinuon  walay  naangol o kinabuhing nakalas  sa maong  katalagman.

Gitataw niya nga wala pa nila matataw ang hinungdan sa kalit nga pagkasunog sa atop sa lobby sa nahisgotang beach resort. (Romeo T.  Limpangog/WC)

DSWD7 ug Julie’s Bakeshop mipirma’g MOA

Sa tinguha nga mabatokan ang kagutom, ang Department of Social Welfare and Development sa rehiyon 7 (DSWD-7) mipirma og Memorandum of Agreement (MOA) sa Julie's Franchise Corporation (JFC) aron matabangan ang  Supplementary Feeding Program (SFP) nga programa sa goberno.

Si DSWD-7 Regional Executive Director Mercedita Jabagat maoy  mipirma sa maong MOA isip hulip ni Secretary Corazon "Dinky" Soliman aron makompleto ang panag-alayon niining maong nasudnon  nga proyekto.    Matud pa ni Kerwin Macopia, usa sa tigpamaba sa DSWD-7 nga ang JFC mo-donate og 'Bayan' sliced bread ngadto sa DSWD-7 nga ibaligya gikan sa Enero hangtod Disyembre ning tuiga.   Gipadayag ni Macopia nga ang makuha nga pundo gikan sa halin niini ihatag ngadto sa DSWD Central Office.

Ang  central office mao  na usab  ang  moapud-apod  niini  ngadto  sa  mga  rehiyonal  nga  buhatan aron ipamalit og  kasangkapan sama sa timbangan, height boards, nga gigamit  sa pagmonitor sa status sa nutrisyon sa mga benepisyaryo sa tanang day care center  sa nasud.

Gipasabot usab ni Macopia nga ang programang SFP nga gisugdan niadtong tuig 2011 usa ka dako  nga programa sa DSWD pagbatok sa kagutom.

Naghatag kini og mga pagkaon pinaagi sa hot meals nga itanyag atol sa oras sa snack ug meal time sa mga kabataan  sulod sa 120 ka adlaw.   Dugang pa ni Macopia nga ubos niining maong feeding program, ang mga nagpanuigon lamang og 3 anyos hangtod 5 anyos ang mahimong benepisyaryo niini.    Gisaysay ni Macopia nga ang Julie's Bakeshop nga natukod niadtong tuig 1981 nga gipangunahan sa mismong tag-iya niini nga si Julie Gandionco usa na sa labing dako nga bakeshop sa tibook nasud. (BANAT NEWS)