Masaker sa Naga!

CEBU, Philippines - Patay ang magkapuyo human gisulod sa ilang panimalay ug gipaulanan og bala pasado alas-7 sa miaging gabii diha sa barangay Cogon dakbayan sa Naga.

Ang magkapuyo giila nga silang Merlita Panlaan, 54, ug Eduardo Prandas, 60, pulos molupyo sa maong dapit. Samtang ang mamumuno giingong duha  ka mga lalaking pulos nagsuot og  itom nga helmet ug jackets.

Sa pakighinabi sa Banat News kang PO1 Bobby Basabe sa Naga Police Station nga sa ilang inisyal nga impormasyon nasayran nga ang biktimang babaye diha sa sala nga bahin sa ilang panimalay nagkalingaw og tan-aw og telebisyon.

Ang lalaking biktima gikatahong diha usab sa ilang lawak nahinanok na og katulog dihang kalit nga gisulod sa duha ka lalaki ug sa walay igong hinungdan mipusil sa babaye ug pagkahuman misulod sa kwarto sa lalaki ug gipaulanan usab kini og bala. Si Panlaan giingong nakaangkon og samad pinusilan sa iyang walang bahin sa apapangig ug sa iyang liog nga maoy naingnan sa iyang hinanaling kamatayon.

Samtang si Prandas usab dunay mga samad pinusilan sa iyang ulo nga maoy naingnan usab sa iyang kamatayon.

Si barangay Cogon Kapitan Emie Talandaron mipadayag nga aduna sila’y pagduda nga ang motibo sa pagpatay may kalambigitan sa away sa yuta tungod usab kay base sa ilang mga records sa barangay aduna sila’y natalang mga barangay blotter batok ni Panlaan.

Matud pa ni Talandaron nga si Panlaan, makadaghan nang gireklamo tungod sa away sa yuta ug gani miabot ang kaso sa korte.

Saysay pa ni Talandaron nga nagsugod ang tanan human ang yuta nga gipuy-an sa biktimang si Panlaan nga giingong gisunod niya gikan sa iyang ginikanan adunay parte niini nga nahalin na.

Apan giingong  ang uban niini gikatahong gipangbawi og balik sa biktima.

Ang kinamaguwangang anak sa biktimang si Panlaan nga si Bryan mipadayag usab nga dako ang iyang pagdudang away gyud sa yuta ang hinungdan sa pagpamusil sa iyang inahan.

Ang duha niya ka igsuon nga nagpangidarun og 15-anyos ug 10-anyos dali nga nakatago atol sa maong insidenti.

Giingong ang 10-anyos nga migawas unta human nakadungog sa buto apan nasugatan niini ang mamumuno ug gikatahong giwakli ang bata.

Ang kapolisan sa dakbayan sa Naga padayon karun nga nag-imbestigar aron mailhan ang mga mamumuno.

Nakuha sa crime scene ang upat ka kabhang sa kalibre .45 ug usa ka deformed slug sa susamang kalibre. (BANAT NEWS)