2 ka manuyopay’g shabu sikop

CEBU, Philippines - Nasikop  sa kapolisan  ang duha ka  mga sakop   sa grupo   sa  manuyopay og  shabu  didto  sa payag sa dalan E. Olivar sa barangay Poblacion sa dakbayan sa Danao  sa  miaging  hapon.

Ang nadakpan mao sila si Florencio Cane Jr., 27, ug Jay Anthony Batoon, 21,  pulos  ulitawo, nga taga  barangay  Manteja ug barangay Masaba  ang  usa ug  usa  sa maong dakbayan.

Si SPO2 Ildefonso Prosia sa kapolisan sa maong dakbayan miingon nga ang team sa kapolisan nga  nakasikop  sa mga suspek gipangulohan sa ilang deputy chief nga si Inspector Romeo Caacoy Jr.

Matud  ni Insp. Caacoy , nga samtang nagpatrolya sila nga nagsakay sa ilang  mobile patrol  car  kalit  lang  nanagan  ang grupo sa mga lalaki nga nakakita kanila gikan sa payag.

Ilang giduol ang maong payag ug sa sulod niini  didto nahibilin ang duha nga sila si Cane ug Batoon nga nagsige pa gihapon og hingus og shabu nga maoy hinungdan nga ila  kining gidakop.

Matud pa ni SPO2 Prosia  nga si  Cane ilang nakuhaan og duha ka putos nga shabu ug mga kahimanan sa paghingus  sama sa tinfoil ug lighter ug si Batoon ilang nasakmitan og duha ka pakete, lighter ug tin foil nga gigamit sa ilang paghingus niini.

Ang duha  ka  mga  dinakpan ang mag-atubang  sa kaso   nga kalapasan sa Republic Act 9165 kon Comprehensive Dangerous Drug Act of 2002. (BANAT NEWS)