Vendor sa Tabunok nabalaka pabalikon sila sa Lagtang

CEBU, Philippines - Ang  mga vendor  sa merkado publiko sa Tabunok nabalaka nga pabalikon na usab sila ngadto sa merkado publiko sa Lagtang.

Dihang misuroy ang mayor sa siyudad sa merkado sa  Tabunok uban sa mga investors niadtong Huwebes sa hapon  nakuyawan  sila nga  gub-on  ang  maong merkado  ug pabalhinon  sila ngadto sa Lagtang. Si Boy Tecson, 55, vendor og karne  sa Tabunok nagkanayon  nga mohangyo sila sa mayor nga dili lang una gub-on ang daang building sa merkado sa Tabunok tungod kay wala pa sila makabawi sa ilang gasto.

Matud ni Tecson  nga niadtong Agosto 8, 2013 sila mibalik  sa Tabunok gikan sa merkado sa Lagtang.

Gibutyag ni Tecson nga sulod sa duha ka tuig alkanse sila  sa ilang pagpaninda sa Lagtang ug buot nilang makabawi sa ilang alkanse.

Kahinumdoman nga giingong ang mga vendor namugos  sa mayor sa Talisay nga mahibalik sila  sa merkado sa Tabunok hinungdan nga ang siyudad migama  og Memorandum of Agreement (MOA) tali sa mga vendor.

Base sa MOA ang siyudad dili mo -refund sa mga nagasto sa vendor sa pagpaayo sa ilang stall ug usab manubag ang siyudad kung adunay mahitabong aksidente  sulod sa merkado.

Ang siyudad maoy mopataod sa linya sa kuryente ug tubig ug mopaayo sa pansayan  sa merkado.

Sa laing bahin, si Marivic Lasquete, bise presidente sa fish section nagkanayon nga manghinaot silang pamation sa mayor ang ilang hangyo nga dili sila pabalikon ngadto sa Lagtang. S Lasquete nagkanayon nga kung gub-on na ang daang building sa merkado ipaubos lang unta kini sa “phase by phase” ug ipahikling sila sa bahin nga wala pa maguba.

Giangkon ni Lasquete ang MOA nga ilang gipirmahan tali sa siyudad ug nagkanayon kini nga dili sila mosupak sa maong kasabutan. Si Mayor Johnny De los Reyes sa iyang bahin, nagkanayon  nga usahon sa pagguba ang daang building kun  sugdan na ang pagtrabaho sa bag-ong building.

Matud sa mayor nga kung magsugod na og guba sa building ang mga vendor temporaryo   nga pabalikon ngadto sa Lagtang paglikay sa disgrasya o aksidente. (BANAT NEWS)