Leo Lastimosa gikombikto tungod sa “Doling Kawatan”

CEBU, Philippines - Gikombikto sa korte kagahapon ang banggiitang tri-media personality sa Sugbu nga si Leo Lastimosa tungod sa kasong libelo may kalambigitan sa lindog niini sa igsuong pamantalaan sa Banat News nga The Freeman.

Kahinumduman nga niadtong 2007, gikiha siya ni kanhi governor Gwendolyn Garcia, karon congresswoman sa third district tungod sa giingong pagpakauwaw kaniya sa lindog niya sa The Freeman nga “Arangkada” nga mogula usab sa Banat News.

Ang lindog ni Lastimosa gititulohan og “Si Doling Kawatan.”

Sa 38-pahina nga desisyon ni Judge Raphael Yrastorza Sr., sa Regional Trial Court nga nakakita siya’g igong basihan sa pagkombikto ni Lastimosa.

Matod niya base sa ebidensya sa prosekusyon nakita niya si “Doling” nagpasabot nga si Garcia.

“While the authorship and publication of the article ‘Si Doling Kawatan’ has been admitted by the accused, he however, vehemently refused to admit that the name ‘Doling’ refers to the governor But, at the risk of undue repetition, the governor was cited by name in his previous attacks against the governor. Accused cannot now deny the obvious reference which is clearly apparent in the said article, just to escape the dire consequences of his act,” sumala pa sa desisyon.

Si Lastimosa gimandoan sa pagmulta og P6,000 ug pabayron usab siya og P2 milyones isip moral damages kang Garcia. Kung di siya mobayad niini mahimong prisuhon si Lastimosa.

Ang maong lindog naghisgot bahin sa usa ka lab-asera nga ginganlan og Doling nga kalit lang nadato dihang nasulod sa politika.

Si Lastimosa miingon nga ang Doling sa iyang lindog wala magtumbok kang Garcia o partikular nga tawo.

Ang depensa ni Lastimosa gidasonan ni kanhi IBP Cebu Chapter president Atty. Democrito Barcenas kinsa nakabasa usab sa maong lindog. “Doling does not refer to Garcia, because Doling there refers to a certain fish vendor, elected as barangay captain and that Garcia was not a fish-vendor nor has she been elected as a barangay captain anywhere in the Province of Cebu,” sumala pa sa pamahayag ni Barcenas.

Ang abogado ni Garcia nga si Lito Astillero nagkanayon nga nahatag gyud ang hustisya sa kataposan.

Apan si Lastimosa miingon nga iyang gitahod ang desisyon ni Yrastorza apan miklaro nga wala kini makapatalaw kaniya aron mas bantayan pa ang mga kahiwian sa mga anaa sa gobiyerno.

Sumala pa ni Lastimosa nga dako ang iyang pagsalig kang Yrastorza nga  hatagan siya og patas ug makatarunganong tratamento sa kaso bisan pa man duna nay mga mitambag kaniyang ipa-inhibit sa kaso ang huwes tungod kay suod kini sa pamilya sa mga Garcia.

Ang kampo ni Lastimosa gikatakdang moapelar sa desisyon ngadto sa Korte Suprema. Ang abogado ni Lastimosa nga si Celso Espinosa nagkanayon wala gyud magpasabot si Lastimosa nga si Doling mao si Garcia sa maong lindog.

Ang pagbasa sa desisyon sa kaso milanat og usa ka oras ug 36-minutos apan wala gyud molingkod si Lastimosa hangtud nahuman ang pagbasa sa desisyon.

Ang pagkombikto kang Lastimosa nakapasubo sa mga kaubanan niini sa media nga nangandam na unta alang sa pagsaulog sa Press Freedom Week ug Kapisanan ng Broadcasters ng Pilipinas Month sa sunod semana.

Ang Cebu Citizens –Press Club (CCPC)  ug Cebu Media Legal Aid (CeMLA) mipagawas og joint statement nga nagpadayag sa kasubo sa desisyon ni Yrastorza apan miawhag sa mga sakop sa media nga dili mawad-an og kaisog paghimo sa ilang trabaho.

Ang CemLA ug ang CCPC namahayag nga dili pa hinuon final ang desisyon ug temporaryo lang kini tungod kay mahimo pang makaapelar sa Court of Appeals ug ngadto sa Korte Suprema diin daghan nang mga kaso ang gipaboran kung ang hisgutan mao ang kagawasan sa pagpadayag.

“Leo’s right to due process is not over. Let it be pursued freely, without the interference or political or economic power, in the higher courts,” matud pa sa joint statement.

Ang presidente sa KBP Cebu Chapter nga si Marloun Baula  nasubo kaayo siya sa gipakanaug nga desisyon sa korte ug miangkong wala sila magdahom niini sanglit klaro sa artikulo ni Lastimosa di ang kanhi gobernador maoy gipunting sa maong lindog.

Ang kanhi usab presidente sa KBP-Cebu nga karon mao nay Public Information Officer sa Cebu City Hall nga si Carlo Dugaduga mipadayag nga kabahin na sa risgo sa trabaho sa media ang mga kiha ug hulga.

Susamang panahom usab ang gibuhian sa usa gihapon ka kanhi presidente sa KBP nga si Atty. Ruphil Bañoc nga maoy station manager sa DYHP.

Giangkon ni Bañoc nga tungod sa kombiksyon makaapektar kini sa kaagresibo sa mga komentarista ug mga maglilindog sa paghimo sa ilang trabaho isip magbalantay sa mga hiwing binuhatan sa mga anaa sa gobiyerno. (/EIM) (BANAT NEWS)