Kapitan “pinanser” sa masiao

CEBU, Philippines - Padayon pang gipangita sa kapolisan ang usa ka kapitan sa barangay human kini giingong gipasanginlang financier sa masiao apan nakaipsot sa gihimong raid sa mga sakop sa Cebu Provincial Police Office sa alas 8:30 sa buntag sa miaging adlaw diha sa usa ka panimalay sa barangay Lamintak Norte, lungsod sa Medellin.

Ang maong kapitan naila nga si Rene Olivar, kapitan sa barangay Lamintak Norte sa Lungsod sa Medellin.

Matud pa ni Inspector Armando Labora  sa Provincial Intelligence Bureau sa CPPO nasakpan sa akto ang maong kapitan uban sa iyang mga sakop nga nag-tally sa masiao.

Apan daling nakadagan si Olivar uban sa laing napulo pa ka mga tawo samtang naposasan dayon ang unom niya ka mga sakop.

Sumala pa nga hilit ang lugar diin sila nagpahigayon sa illegal nga sugal aron dili madali nga masakpan.

Matud pa ni Inspector Labora nga dugay na nilang gipanid-an ang kalihokan ni Olivar.

Ang raiding team gipangulohan ni Inspector Leo Logroño nga miresulta sa pagkasikop nila ni Rogelio Ansero Mangubat, Teodoro Bardisco Yurag, Alfredo Rosales Yurag, Monalisa Pradilla Lanurias, Michael Myol Yuson ug si Rosabella Canales Gulfan.

Sumala pa nga nakuha sa kapolisan ang 12 ka mga motorsiklo, kwarta nga nagkantidad nga P2,300.00, mga tally sheets ug ang usa ka multicab nga gipanag-iya sa barangay Lamintak Norte nga may plate number SEM 468.

Ang kapolisan mikonsiderar kang Olivar nga “priority” sa ilang listahan sa financier sa illegal nga sugal. (/EIM) (BANAT NEWS)