Oil sheen nasigpatan sa Talisay

CEBU, Philippines - Mga coastal barangays sa dakbayan sa Talisay naapektohan na sa oil spill tungod sa pagbali na sa hangin.

Kahinumduman nga dihang nahitabo ang oil spill gikan sa nalunod nga passenger vessel nga M/V St. Thomas De Aquinas diha sa Lawis Ledge, dakbayan sa Talisay naatol niadtong ang huros sa hanging amihan hinungdan nga ang oil spill gianod sa bawod paingon ngadto sa kadagatan sa dakbayan sa Lapu-Lapu ug lungsod sa Cordova.

Apan niining paghuros sa hanging habagat ang oil spill gikan sa nahisgutang lungsod ug siyudad mipaingon na usab kini sa Talisay.

Si Cmdr. Weniel Azcuna, Philippine Coast Guard –Cebu Station mibisita sa Talisay mibutyag nga ang mga apektadong lugar mao ang barangay Cansojong, Poblacion sitio Litmon ug Pooc. Ang sitio Litmon nagbahin kini sa duha ka barangay sa Poblacion ug Dumlog.

Gipasabot ni Azcuna nga ang miabot diha sa Talisay “oil sheen” lang kay dili kini baga nga lana ug dili gyud grabe ang epekto niini.

Si Talisay City Public Information Officer (PIO) Vincie Monterde nagkanayon nga ang  Fishermen Sea and Ecological Care (FISECA) nakamatikod sa oil spill.

Ang mga residente sa mga apektadong lugar mitabang paglimpiyo sa kabaybayonan uban sa 2,000 ka mga mananagat.

Ang maong mga mananagat nakabenepisyo kini sa emergency employment sa Department of Labor and Employment (DOLE) diin sila bayran sa ilang pagtrabaho.

Si Rose Saya-ang, community development specialist sa Department of Environment and Natural Resources (DENR) mipasidaan nga dili pa maayong kaligoan ang kadagatan sa naapektahang barangay. (/EIM) (BANAT NEWS)