Pagpangita sa mga na-missing magpadayon

CEBU, Philippines - Magpadayon sa ilang search and retrieval operation hangtud nga mahurot og kakuha ang mga patay’ng lawas sa mga tawong na-trapped ilawom sa nalunod nga barkong MV Saint Thomas Aquinas diha sa Lawis Ledge sa siyudad sa Talisay.

Matud pa sa report sa DyRC Radyo Calungsod Cebu, kini maoy pasalig sa mga sakop sa hiniusang task group STA-R kun St. Thomas Aquinas Retrieval nga gilangkoban sa Philippine Navy, Philippine Coast Guard,  Philippine National Police ug mga civilian volunteer technical divers aron sa pagkuha sa nahabiling mga patay’ng lawas sa nalunod nga barko.

Ang maong pamahayag gipagawas tungod sa mga mikatap nga report nga hunongon na ang search and retrieval operations. Si Commodore Reynaldo Yoma, Commander sa Philippine Navy dinhi sa Central Visayas miingon wala nila igsapayan ang kalisod ug peligro sa maong operasyon.

Moabot na sa 50 ka patay’ng lawas gikan sa nalunod nga barko ang naugkat gikan sa 39 ka dive sorties sa mga divers.

Samtang si Lt. Junior Grade Josephus Dimaunahan , usa sa mga divers miingon nga nasulod na nila ang deck A sa barko nga maoy gikahimutangan sa economy class diin nakuha ang kadaghanan sa mga nakalas.

Gibutyag niya nga dunay mga agianan nga dili na kalutsan tungod sa mga bagahe ug mga butang nga nakababag nga nagbutang kanila sa peligro maong gikinahanglan nilang mangita og laing agianan o ba kaha hawanan.

Ang task group aduna ray 59 ka mga technical ug support divers nga nagbanos-banos sa pagsawom kada adlaw. (BANAT NEWS)