SBMI misuspenso sa inquiry kagahapon

CEBU, Philippines - Gisuspenso una kagahapon sa Special Board of Marine Inquiry (SBMI) ang  hearing bahin sa  panagbangga sa  duha  ka  barko  sa  kadagatan  sa dakbayan  sa Talisay  niadtong  Agosto 16  sa gabii  tungod  kay walay  mitunga  nga  saksi.

Ang  maong  mga  barko  mao  ang Sulpicio Express 7 sa Sulpicio Shipping Company ug ang  M/V Thomas  De Aquinas   pasaheroang  barko  sa 2GO Shipping.

Si Lieutenant Johonsan Fabilane sa Philippine Coast Guard (PCG) ug membro sa SBMI mibutyag sa mga tigbalita  nga  aduna sila’y giimbitar nga resource person nga taga Sulpicio apan wala kini mokonpirma  nga  motambong.

Matud ni Fabilane nga kung wala nay motungha nga mga resource person ipahigayon na nila ang deliberation sa ilang inquiry ug ipadala nila ang resulta ngadto   ni Presidente  Aquino apan iagi una nila ang resulta ngadto sa Department of Transportation and Communication (DOTC).

Giklaro ni Fabilane nga ang SBMI dili maoy mopasaka og kaso batok sa mga responsable sa hitabo.

Gipasabot niya nga ang SBMI igo lang sa pagpahigayon sa imbestigasyon ug ang resulta  niini maoy mahimong basehan sa mga resource persons ug uban pang hinungdan sa pagpasaka nila og reklamo.

Matud ni Fabilane nga posibleng morekomendar ang SBMI og reporma aron dili na masubli  ang  maong hitabo.

Sa laing bahin, si Riza Tangpus sa Cosmopolitan Funeral Parlor   nga  maoy  mibalsamar  sa  mga patay’ng lawas sa biktima  mibutyag nga sukad niadtong Agosto 27, 2013 sa alas 6:20 sa gabii mikabat na  sa 80 ka patay’ng lawas ang  anaa  sa  ilang  punerarya.

Kini walay labot sa mga parti sa lawas nga naglangkub sa tuo  ug walang bahin sa tibuok paa  ug  tiil, ibabaw’ng bahin sa lawas ug tuong bukton.

Si Tangpuz midugang nga mikabat  sa 49 ka mga patay ang gikuha na sa mga tagtungod sukad sa milabay’ng Martes. (BANAT NEWS)