Pork barrel sa tulo ka cebuano solon gisusi tungod sa anomalya

CEBU, Philippines - Ang Office of the Ombudsman-Visayas andam moimbestigar sa anomaliya sa Priority Development Assistance Fund (PDAF) or pork barrel sa mga kongresista dinhi sa Kabisay-an.

Kini matud pa ni Deputy Ombudsman for the Visayas Pelagio Apostol atol sa interview kagahapon sa iyang opisina. Gani matud pa niya dunay tulo ka PDAF cases nga ilang gi-investigate karun sa ilang buhatan nga naglakip sa PDAF ni kanhi congressman sa Cebu City south Antonio Cuenco nga gihatag sa Vicente Sotto Memorial Medical Center (VSMMC).  Apan si Cuenco exempted sa maong kaso.

Nagdumili hinuon pagbutyag si Apostol sa media kun si kinsa ang laing duha ka kongresista nga gisubay nila karon. Sumala pa niya dunay mga complainants nga misang-at og reklamo batok sa maong duha ka kongresista nga gustong paimbestigahan ang ilang mga pork barrel.

Si Apostol nagkanayon nga ang ilang buhatan dili manginlabot sa issue sa abolition sa pork barrel tungod kay political issue kini.

Para malikayan ang pag-abuso sa pork barrel, si Apostol nagkanayon nga kinahanglang kadto ra gyung mga lehitimong organisasyon o departamento ang butangan sa pundo.

Matud niya kung ang katuyoan alang sa health services kinahanglang adto ibutang ang pundo sa Department of Health, sa social services sa Department of Social Welfare and Development aron dunay proper liquidation. (BANAT NEWS)