Lung Month gisaulog sa DOH

CEBU, Philippines - Ang  kagamhanan  magsaulog ning  buwan  sa Agosto isip Lung  Month  uban sa paningkamot  nga   hangtud  sa 2016 mokibra  ang  masakiton  og tuberculosis  (TB) sa  katunga. Kini  gibutyag  ni  Jocelyn  Tabotabo  sa Department of Health (DOH)7 sa tulumanon  AGIO Forum  nga  gipalanog  sa DYMR.

Matud pa  ni Tabotabo nga  sa milabay  nga  tuig 2012 mikabat  sa 13,457  ang  kaso  sa TB  dinhi  sa  rehiyon  7.

Ang  maong  gidaghanon  labaw og 879 sa tuig  2011  diin  mikabat  lang  sa 12,578  ang  kaso  sa maong  balatian  dinhi  sa rehiyon.

Gitumbok  ni Tabotabo  nga  kasagaran  sa masakiton  og  TB mao  kadtong  mga  kabataan,  hamtong  ug  tiguwang  nga  adunay  kaliwat  o  dugo  nga may sakit nga TB.

Ang  uban  natakdan  sa daan  na  nga  masakiton  apan wa  magpakonsulta  dayon  sa doktor. Mao  man  gani  nga  giawhag  ni  Tabotabo  ang  matag  usa  nga  sa panahon  nga  mamatikdan  niini  ang  hilanat  nga walay  undang,  uban  sa ubo-ubo  nga  dili  na  maayo  og  tambal,  kinahanglang  mokonsulta  dayon  sa mga  health  center  sa ilang tagsa-tagsa  ka  lugar.

Kini  tungod  kay ang  sayo nga  pagka-diskobre  sa maong  sakit sayon  usab  kini  nga  maayo. Midugang  si  Tabotabo  nga  may  libreng  tambal  ang  kagamhanan  nga  alang sa  mga  kabus  nga  may sakit nga TB.

Ang  mahinungdanon  matud  pa  niya  nga  mahuman  og  tomar  ang  mga  tambal  nga  giresita  sa  mga  doktor  ngadto  sa pasyente.

Kay  kun  dili  mahuman,  tungod  sa pagtuo  nga  maayo  na  ang  pasyente,  mangisog  ang  kagaw  sa TB  ug  mosamot  kadaku  ang  sakit  sa pasyente.

Miingon  si Tabotabo  nga  kun  modako  ang  maong  sakit  maglisud  na ang  pasyente  sa  pagkaayo  ug  mosangpot  hinuon kini  sa iyang  kamatayon.

Usa  sa  mga  nag-unang  hinungdan  sa maong  sakit  mao  ang  sigarilyo  diin  gumikan  sa aso  matakdan  usab  ang  mga  kauban sa balay  sama  sa asawa ug  mga  anak,  ug  uban  pa.

    Sa laing  gipasabot  ni Tabotabo nga  ang  kasaulogan  sa buwan  sa Agosto isip  Lung  Month  maoy  paghandum  sa kamatayon  ni anhing  Presidente  Manuel L. Quezon  kinsa  namatay  sa buwan  sa Agosto gumikan sa sakit  nga  TB. (BANAT NEWS)