Finance manager sa simbahan gikombikto tungod sa pagkawat og tunga sa milyon

CEBU, Philippines - Gikombikto sa korte sa kasong qualified theft ang kanhi financial manager sa Sacred Heart Parish Church sa siyudad sa Sugbu.

Ang kanhi accountant nga si Evelyn Mercader gipasanginlang mikawat og P557, 650 sa kaban sa simbahan sud sa 12 ka higayon.

Pagkaprisoog 146 hangtod 173 ka tuig ang silot kaniya apan matod ni Regional Trial Court Branch 7 Judge Simeon Dumdum, 40 ka tuig na lang ang iyang serbisyohan.

Nakatrabaho si Mercader sa parokya sulod sa baynte ka tuig. Siya ang tigmantala sa binuwan nga kita ug galastohan sa simbahan.

Si Mercader maoy sinaligan sa mga financial books ug yawe sa safety vault diin nakatago ang inadlaw-adlaw nga koleksyon sa simbahan, apil na niini ang uban pang kita.

Pag-resign ni Mercader sa tuig 2004, nahibulong ang parokyano nganong P30,000 na lang ang sulod sa ilang bangko ug utangan ang parokya og P1 million alang sa mga bayranan sa kuryente, tubig, ug uban pa.

Base sa minutes sa parish financial committee, giangkon ni Mercader ang pagpangawat apan P800,000 ra ang giangkon niyang nakuha ug misaad siyang iuli kini pinaagi sa datadata, apan pag-abot sa korte gihimakak niya nga nangawat siya’g kwarta.

Piyanista sa parokya ang amahan ni Mercader ug nagdako kini sulod sa parokya. Gihatagan si Mercader og college scholarship sa mga pari ug sa iyang pagtapos nahimo siyang parish bookkeeper, head sa accounting office ug nahimong parish accountant. (BANAT NEWS)