Modernong traffic lights sa Mandaue pasigahon sa Biyernes

CEBU, Philippines - Pormal nga mo-operate ang siyam ka bag-ong gimuntar nga traffic lights sa siyam usab ka mga "major intersections" sa dakbayan sa Mandaue karong umaabot Biyernes Agosto 30.

Matud pa ni Mandaue City Councilor Diosdado Suico ang ceremonial switching himuon ni Mayor Jonas Cortes ug kabahin gihapon kini sa usa ka bulang ika-44 Charter Day celebration sa siyudad.

Ang pagbutang sa maong mga kahimanan sa trapiko nauyonan tungod sa nakitang panginahanglan niini ilabi na sa dagkong mga dalan sa Mandaue  City reclamation area.

Sumala pa nga duna kini kaugalingong timers nga makita sa mga motorista aron makabantay kini sa ilang torno sa paghunong ug pag-abante nga dili pagbanabana lamang nga sagad moresulta sa disgrasya.

Ang maong kahimanan mao usab ang gigamit sa kaulohan diin hapsay na ang dagan sa mga motorista inig abot sa usa ka intersection. (BANAT NEWS)