Drayber sa Ceres bus hayan buhian

CEBU, Philippines - Posibleng makagawas na sa karsel ang driver sa Ceres bus nga nalimbuwad niadtong Domingo sa buntag diha sa national highway sa Talaga lungsod sa Argao.

Ang hepe sa kapolisan sa Argao, Sr. Insp. Alejandro Batubalonos, mipadayag dihang nahinabi sa Banat News nga ang igsuon sa namatay’ng si Maria Teresa Ceballos midangop sa ilang buhatan ug mipadayag nga wala na sila’y planong mopasaka pa og kaso batok sa driver nga si Ernesto Zerna.

Matud pa ni Batubalonos nga kagahapong adlawa, nagpaabot sila sa uban pang mga pasahero nga naangol sa maong pagkalimbuwad sa bus.

“Human error gyud to, dili man defective ang ilang sakyanan unya giangkon man sad sa driver nga iya gyud tong sala” padayag pa ni Batubalonos.

Pahimangno ni Batubalonos sa tanang mga driver nga unta dili kini makiglumba sa kakompetensyang mga bus ug unahon nila ang kaluwasan sa mga pasaherong ilang gidala.

“Dili gyud unta na sila angayang magpakusog og taman ug maglumba kay daghan gud na nga kinabuhi ang ilang gidala, delikado kaayo” padayag pa ni Batubalonos.

Samtang, nasayran usab sa kapolisan nga ang namatay’ng si Ceballos, nalagpot diay sa sulod sa Ceres Bus ug sa dihang mitakilid na kini nga patubang mobalintong didto na siya nadat-ogan nga miresulta sa iyang kamatayon.

Kahinumduman nga ang Ceres Bus nga gimaniho ni Zerna patubang sa dakbayan sa Sugbo nga adunay siyam ka pasahero ug giingong nakiglumba kini sa Sunrays Bus nga patubang usab sa dakbayan sa Sugbo.

Sa diha nga naabot kini sa maong dapit gikatahong misuway sa pag-overtake ang driver sa traysikad apan giingong mibalik kini sa agi tungod kay aduna may prime mover nga gikatagbo.

Apan tungod sa iyang kakusog wala na siya makakontrolar pa sa manobela ug mibalintong na hinoon ang bus. (/EIM) (BANAT NEWS)