Cooperative congress gitakda sa Oktubre sa CICC

CEBU, Philippines - Ang duha ka adlaw nga  Central Visayas Cooperative Congress  gitakda  nga  ipahigayon    sa Cebu International Convention Center (CICC) sa dakbayan sa Mandaue,  unya  sa Oktobre 25 ug 26, 2013. Ang maong kalihokan nga  may  tema nga “Hiniusang Panglantaw ug Kaakohan Alang sa Lig-ong Kooperatiba” gitumong alang  sa  kaayohan  sa  miyembro  niini pinaagi  sa pagtinabangay.

Gitumong usab kini  alang sa paghugpong sa mga lider ug   mga  opisyal  sa kooperatiba  dinhi sa rehiyon aron  sa pagpaambitay  sa mga paagi aron labing  molig-on sa kalambigitan sa matag usa.

Gilauman usab nga  sa maong  panagkatigom matuki  ang mga  mahinungdanong isyu nga naglambigit sa kahimtang sa kooperatiba ug ingon man usab ang kalamboan sa  National Tripartite Conference.

Si Mandaue City Councilor Bethoven Andaya nga maoy chairman  sa Regional Cooperative Development Council (RCDC) 7  miingon nga ang cooperative convergence dinhi sa rehiyon nahimo  tungod  sa gihatag nga kahigayonan sa lokal host nga mao  ang Mandaue City Cooperative Development Council (MCCDC). Gisuportahan  usab  kini  sa   Cooperative Development Council Authority.

Dugang nga makighiusa sa maong kalihokan mao si CDA 7 Regional Director Philip Deri ug ingon man usab ang tanang sakop sa kooperatiba ug mga kapitalista nga maoy hinungdan   nga  nahatagan og katumanan ang maong kalihokan. (BANAT NEWS)