Kasambahay forum gipahigayon sa DOLE-7

CEBU, Philippines - Subay sa hingpit nga implementasyon sa Republic Act No. 10631 o gitawag nga "Kasambahay Law", nga gipatuman niadtong Hunyo 4 ning tuiga, ang Department of Labor and Employment 7 (DOLE-7) malampusong mipahigayon sa ilang Kasambahay Forum  nga giabagan  sa mga nagkadaiyang magpapatigayon.

Matud pa ni Emmanuel Ferrer, Regional Labor Communication Officer sa DOLE-7, nga ang maong kalihokan gitumong sa pag-umol og maayong aksyon ug stratehiya kalabot sa pag- implementar sa maong balaod.

Atol usab sa pagpamulong ni DOLE-7 Regional Director Chona M. Mantilla, iyang gihangop ang presensya sa mga magpapatigayon nga gikan sa gobiyerno ug pribadong sektor.

“I expect that we will have series of follow-up meetings that would entail your respective cooperation. The implementation of this law will soon yield new discoveries that we have to address as implementors”, kini matud pa ni Mantilla.

Dugang pa ni Mantilla nga sa sayo pa sa bulan sa Abril, aduna nay daghang mga pangutana ug komento nga nadawat sa ilang buhatan subay sa implementasyon sa maong balaod.

Gipadayag usab ni Ferrer nga atol sa maong kalihokan, si Sally Manamparan nga kanhi usa ka kasambahay mipaambit sa iyang kasinatian kung giunsa niya pag-atiman  ang iyang amo bisan pa man og wala siya’y nadawat nga mga benepisyo.

Dugang pa ni Ferrer nga malipayon gayud kaayo si Manamparan tungod kay mipasar naman  ang maong balaodnon ug  nahimo na gayud kining balaod.

Tungod  niini naglaum  siya nga kahatagan na og kinatibuk-ang katungod ang mga kasambahay nga makadawat og mga benepisyo.

Samtang si Ms. Rose Tatoy sa Department of Social Welfare and Development (DSWD-7) mipaambit usab sa iyang estorya isip usa ka kanhing Kasambahay diin dako kaayo siya og pasalamat sa iyang amo tungod sa pagkamaayo sa batasan niini.

Gisuportahan gayud siya sa iyang pagtungha hangtod nga siya nakagradwar  ug  karon kasamtangang nagtrabaho na siya sa buhatan sa DSWD-7.

Gisaysay ni Ferrer nga atol sa maong forum, daghang mga pangutana sama sa mga kontribusyon, rehistrasyon sa kasambahay, katungod sa mga kasambahay ug uban pang mga legal nga mga pangutana ang gitubag sa mga panelist.

Gilangkuban nila ni Director Mantilla sa DOLE 7, Atty. Jose Ogang sa DOLE 7, Engr. Vicente Avordo sa DOLE 7, Ms. Helen Solito sa Social Security System sa Rehiyon 7 (SSS-7), Portia Bacalso sa Home Mutual Development Fund (Pag-Ibig), Department of Interior and Local Government (DILG-7) Atty Aizza Nogra ug Philippine Health Insurance Corporation (PhilHealth-7) Maria Cristina Ramos.

Gitug-an ni Ferrer nga gipresentar usab ang tagsa-tagsa ka responsibilidad sa mga makapahimus sa maong balaod. (BANAT NEWS)