Anti-Pork Barrel rally karon

CEBU, Philippines - Gipaabot nga liboan ka mga tawo ang mosalmot sa himuong rally ang ilusad karong adlawa alas-7 sa buntag diha sa Fuente Osmeña Rotunda padung sa Plaza Independencia agi og pagpadayag sa dakong pagsupak sa mga Sugboanon sa mga anomaly sa pork barrel sa mga kongresista.

Ang mga Sugbuanon nga momartsa salmotan sa nagkadaiyang sector, mga propesyonal, mga yanong mamumuo ug mga estudyante. Gidid-an hinuon sa mga organizers (nga wala magpaila sa ngalan sa ilang grupo) ang mga politiko, partilista ug uban pa nga dunay political interest sa pagsalmot.

Ang mga militante welcome sa maong kalihokan apan gidid-an sila sa pagdala og mga banners. Ang martsa sugdan alas-7 sa buntag padung sa Plaza ug human sa Santos nga Misa ni Cebu Archbishop Jose Palma awhagon niya ang nanimba sa pagsalmot sa maong rally.

Si Cebu City Police Office director Noli Romana mopakatap og mga polis sa rally route aron pagmentinar sa kahapsay ug kalinaw sa maong kalihokan.

Si City Traffic Office Management Chairman Arthur Yap mipahibalo nga walay road closure nga ipatuman, wala say dugang traffic enforcers nga idestino  sa rally tungod kay napanglantawang menus ra ang sakyanan tungod kay holiday man. (BANAT NEWS)