PCG naka-monitor sa radio traffic sa panagbangga sa duha ka barko

CEBU, Philippines - Na-monitor sa Philippine Coast Guard ang pagtawagay sa radio sa duha ka barkong nagkabangga diha sa bukana sa Mactan Channel sa dakbayan sa Talisay sa wala pa kini mahitabo niadtong Agosto 16.

Sa ikatulong adlaw sa nagpadayong Special Board of Marine Inquiry (SBMI) kalabot sa panagbangga sa MV St. Thomas Aquinas sa 2Go Travel ug Sulpicio Express Siete sa Philippine Span Asia Carrier Corporation gikompirmar sa watch man on duty sa coast guard nga mitawag ang cargo vessel sa passenger vessel.

Sa report sa DyRC, si Seawoman First Class Fritzie Pun-an, kinsa maoy gangwatch on duty sa PCG nianang pagkahitabo maoy gikuhang resource person sa SBMI aron isaysay ang iyang na-nomitor diha sa radio.

Matud pa ni Pun-an pasado alas 8 sa gabii niadtong Agosto 16 na-monitor niya sa ilang radio nga ang Sulpicio nagsubay sa inbound route ug mi-request kini nga mag Port to Port. Mibutyag usab siya nga nakadungog usab siyang mitawag ang Trans Asia 9 sa Sulpicio nga nananghid kini nga mo -overtake kanila.

Matud pang Pun-an pwerteng busy-ha ang channel 16 sa ilang radio ug lisod na masabtan ang mga tawag. Apan naka-monitor siya nga mitawag ang Sulpicio nga nakabangga sila sa pasaheroan.

Paglabay sa 10-minutos nakadawat siya sa distress signal nga “mayday” sa Saint Thomas Aquinas, hinungdan nga iyang gipahibalo ang iyang mga labaw ug na-dispatch dayon ang  usa sa ilang mga rescue vessels sa scene.

Niadtong ikaduhang adlaw (Sabado) sa SBMI, ang mga sea marshalls nga sila si Petty Officer 2 Joseph Austria (Coast Guard) ug Seaman First Class Richard Pestillos misaysay nga nag-panic gyud ang mga pasahero human sa pagbangga.

Matud pa nila dunay nanaka sa atop ug duna say mga nanglayat sa barko hinungdan nga dunay mga nangabalian og mga tiil tungod kay ang ilang gitugpahan puthaw man inay tubig sa dagat. Samtang duna say nanglayat nga nagsuot og lifejackets apan lifejackets nalang maoy milutaw.

Ang 3rd mate sa 2Go ship nga si Warlito Canillo miangkong nasipyat siya pagsusi sa Closest Point of Approach (CPA) nga sumala pa sa SBMI importante kaayo aron malikayan ang panagbangga. (BANAT NEWS)