Sea mishap: Birthday celebration nga napunta sa trahedya
CEBU, Philippines - Birthday celebration unta maoy tuyo sa usa ka pamilya didto sa Manila sa ilang 5-anyos nga miyembro sa banay, apan trahedya ang ilang nasugatan dihang nalunod ang ilang barkong gisakyan MV St. Thomas de Aquinas diha sa Lawis Ledge niadtong Biyernes.
Si Rubelyn Duro, 29, lumulupyo sa Bayugan, Butuan dihang nahinabi sa Banat News dili makatuo nga mabuhi pa siya.
“Wala na ko magdahom nga maluwas, daghan kaayong nagsinggit, naningkamot na lang ko’g langoy,†matud pa ni Duro.
Siya mitug-an nga padulong unta ang ilang pamilya sa Manila kuyog sa iyang amahan, inahan, igsuon ug iyang pag-umangkon apan naapil man hinuon sila sa maong trahedya.
Kuyog niya ang iyang amahan nga usa sa mga missing nga si Jaime Ahit, 63, iyang inahan nga si Abundia Ahit, 57, si Glenalyn Gumanid, 20 anyos ug ang 5- anyos niya nga pag-umangkon nga si Danilo Pacaña nga usa sa mga namatay.
Dugang pa ni Duro, nga tuyo unta nila nga saulogon sa adlaw’ng natawhan sa ilang pag-umangkon nga si Danilo niadtong petsa 19 sa Agosto adlaw nga Lunes.
Apan tulo ka adlaw una pa ang selebrasyon nahitabo na ang aksidente ug ang ilang pag-umangkong ilaha untang i-treat didto sa Manila sa iyang birthday usa sa mga na-missing.
Matud pa niya wala sila kabantay dayon nga nabangga ang ilang gisakyang barko ug nahibulong na lang sila nga kalit lang napawong ang suga niini dayong dinaganay sa mga tawo.
“Pagkapawong sa suga natarantar na mi,†asoy pa ni Duro.
Midugang siya nga nagdinaganay sila aron maluwas ug buot unta siyang mokatkat apan wala na siya’y kaagian busa minaog siya sa silong.
“Taas na man kaayo, mao ‘to nagpadidit mi sa tubo nya nagdinaganay mi sa gawas,†matud pa sa ginang.
Dali siyang miambak apan dugay siya nga nakatunga, wala siya makabantay dayon nga giitsa na sa iyang igsoon si Danilo sa dagat apan uwahi na lang niyang nakit-an ang bata nga nagkapa-kapa padung na og tidlom ug nagpinangitaay na silang duha sa iyang igsuon sa bata nga miambak na usab.
“Sakit kaayo sa akong buot, tarong unta ang among tuyo ngadto unya mao na man ‘nuon ni ang nahitabo,†asoy ni Duro.
Nakit-an na si Danilo apan patay na kini ug missing pa ang ilang amahan.
Dihang gipangutana sa Banat News kung mosakay pa siya og balik og barko, si Duro miingon nga mahadlok na siya niini.
Ang patay nga lawas sa 5- anyos nga si Danilo anaa karon sa Cosmopolitan Funeral Parlor samtang nagpabiling missing ang amahan ni Duro nga si Jaime Ahit.( /EIM) (BANAT NEWS)
- Latest
