Oil spill gibantayan sa taga Mandaue

CEBU, Philippines - Higpit nga gibantayan sa kagamhanan sa dakbayan sa Mandaue ang daplin sa ilang kabaybayonan batok  sa  oil spill.

Nagtigom  na  sila  karon  og  mga bunot, lanot,  ginabas  ug uban pa nga magamit sa pagpakgang   sa asayte  ug  krudo  nga  ila  karong  gipundo sa Mandaue City Cultural and Sports Complex.

Naglakip sa mga barangay nga anaa  sa baybayon  mao  ang  Jagobiao, Labogon, Basak, Paknaan, Umapad, Opao, Looc, Centro  ug barangay Subangdaku.

Si Cesar Mercadal nga maoy pangulo sa Solid Waste and Management program sa kagamhanan sa maong dakbayan nga nahinabi sa Banat News miingon nga gisiguro nila ang dinalian nga pagpakgang   sa oil  spill nga madagsa sa ilang kabaybayonan

Dugang pa niya nga ilang  tuyo  nga dili madagsa sa baybayon ang bunker oil   kun taob  ang  dagat kay  mahabilin  kini  ug  mopilit  sa  mga  bakhaw  ug  pagatpat  ninghunas  ug dako ang trabaho ang pagtangtang. Gitataw ni Mercadal nga ang 80 ka mananagat sa dakbayan ilang gibahig sa duha ka grupo  nga maoy gitahasan sa pag-monitor sa kabaybayonan

Si Umapad Barangay Kapitan Nelson Rubio nga maoy cluster head sa Barangay Disaster  Risk Reduction and Management  Council (BDRRMC) miingon nga   sukad sa pagkalunod sa St. Thomas Aquinas niadtong Agosto 16 sa gabii gihimo  nila  ang higpit nga pagsusi  sa mga baybayon  ug wala sila makamatikod  og  lana  hangtod niining panahona. (/WC) (BANAT NEWS)