Lima naangol dihang ilang van nasampak sa poste
CEBU, Philippines - Lima ka mga tawo ang nangaangol dihang ang Nissan Grandia nga ilang gisakyan nabangga sa poste sa Visayan Electric Company (VECO) sa eskina sa dalan Hernan Cortes ug dalan M.L. Quezon sa barangay Cabancalan, dakbayan sa Mandaue.
Ang mga naangol mao sila si Hiruki Ochicawa, 18, Japanese national, Honey Casewani, 42, Rhea Arquillano, 19, Maricel Arabes, 26 ug Hironi Ochicawa 40, Japanese national ug nagpuyo sa Greenhills Subdivision, barangay Cabancalan sa maong dakbayan.
Si Rodrigo Peralta, NUP sa Traffic Division sa Mandaue City Police Office (MCPO) nga nahinabi sa Banat News miingon nga ang van gimaneho ni Juliet Codo misubay sa dalan Hernan Cortes gikan sa barangay Subangdaku.
Apan paghidangat sa eskina sa dalan M.L. Quezon sa barangay Cabancalan kalit lang kining nasampak sa poste sa kuryente hinungdan sa pagkaguba sa sakyanan ug pagkaangol sa mga sakay niini.
Ang mga biktima daling gidala sa North General Hospital sa barangay Banilad sa maong siyudad, nasuta nga wala makarkula og maayo ni Codo ang distansya sa pagliko niini hinungdan sa pagkabangga. (BANAT NEWS)
- Latest
