3 dalagita nga nanguot sa korean nadakpan

CEBU, Philippines - Mopasaka gyod og kaso ang usa ka Koreano nga gikawatan sa tulo ka mga menor de edad sa J. Osmeña eskina sa Gen. Maxilom barangay Camputhaw sa dakbayan sa Sugbo sa may alas 3:20 sa kaadlawon sa kagahapong adlawa. Ang biktima naila nga si Chung Myuongsub alyas Bale, 23- anyos, usa ka Korean national nga kasamtangang nagpuyo sa barangay Pusok sa dakbayan sa Lapu-lapu.

Tulo ka mga batang babaye maoy giingong mialirong kaniya ug sa iyang higala samtang padung na sila pauli gikan sa diskohan sa maong lugar. Si Chung sa pakighinabi sa Banat News  miingon nga padung na sila mosakay og taxi dihang mibutho ang mga bata  ug ang usa mikupot sa biktima, ug ang laing duha nag-iyahay lang og kuot sa iyang bulsa.

Dihang may nangabot nga polis wala na makadagan pa ang mga bata nga nag-edad pa og 16-anyos ug nabawi ang iyang cellphone. (BANAT NEWS)