DOH mipahibalo sa peligro sa hinungaw sa oil spill ngadto sa mga residente

CEBU, Philippines - Ang Department of Health miawhag sa mga mangingisda ug mga pamilyang nagpuyo sa mga baybayon sa lungsod sa Cordova nga mo-evacuate na dayon aron malikayan ang unsa mang sakit nga makuha gikan sa oil spill.

Matod sa Regional Epidemiology and Surveillance Unit officer sa DOH-7 Rennan Cimafranca nga temporaryo lamang ang evacuation samtang di pa luwas ang mga pamilya gumikan sa baho sa krudo.  Misaysay si Cimafranca nga dako nga risgo kung di mobiya ang mga pamilya gumikan kay ang grabeng exposure ug pagsimhot sa baho sa krudo makahatag og sakit sa baga ug panit.

Dugang pasidaan ni Cimafranca nga ang pagkaon usab og mga seafoods nga naapektohan sa oil spill moresulta sa grabeng hilanat, sakit sa tiyan, labad sa ulo ug grabeng pagsuka. Apan ang mayor sa Cordova nga si Mayor Adelino Sitoy di uyon niini tungod kay wala sila’y kabutangan sa mga pamilya sa kapin dos mil ka mga apektadong mananagat.

“Di man pud na mangirog mga tawhana (mangingisda), di man gani na mangirog kun bagyo,” matud pang Sitoy.

Samtang, nagmalamposon ang gipahigayong clean-up operaton sa mga opisyal ug empleyado sa Kapitolyo kagahapon sa upat ka barangay sa lungsod sa Cordova, sa pakigtambayayong usab sa Peoples Organization, Local Government Units ug mga mangingisda.

Nagtinabangay ang tanan gamit ang mga improvised oil spill boom nga ginama sa sako nga ginama sa abaca, bunot ug foam. (BANAT NEWS)