Public school teacher gisuspenso kay nangusi og tinun-an

CEBU, Philippines - Usa ka magtutudlo ang gisuspenso sud sa usa ka buwan ug usa ka adlaw nga way sweldo human kini mamatud-i sa gihimong imbestigasyon sa Office of the Ombudsman-Visayas nga sad-an sa kasong administratiba.

Nasuta ni graft investigation and prosecution officer Eleanor Tayad-de Mira nga gikusi gyud ni Ma. Glynn Sumagang ang duha ka managsuon nga nag edad og 9-anyos ug 8-anyos nga mga tinun-an sa Cordova Central School, sa Cordova, Cebu.

Si Sumagang matud pa sa ombudsman nga guilty og simple misconduct.

Usa ka Winnie Marie Poliquit ang mipasaka og kaso batok sa maong magtutudlo human misumbong kaniya ang iyang mga anak niadtong Marso 29, 2012 nga gikusi sila sa bugan ni Sumagang diha sa ilang eskuylahan.

Matud niya nga human sa klase sa iyang mga anak kini niadto sa gym diin nagduwa ang ubang mga bata apan giingong gibadlong sila sa maong magtutudlo kay dili paduwaan ang gym apan wala mopatuo ang mga bata.

Kini maoy hinungdan nga giingong giduol sila ni Sumagang ug gikusi ilang mga bugan.

Sa iyang counter-affidavit, gihimakak ni Sumagang ang maong pasangil. Matud niya wala siya’y intensyon nga makamugna og kadaot sa mga bata.

Siya miesplikar nga nanaod sila og dekorasyon sa gym nianang adlawa tungod sa closing and recognition exercises sa pagkasunod adlaw apan ang mga bata nagsige og duwa sa sulod sa gym bisan og gidid-an. Tungod kay wala kini mituman, matod niya mihunong siya dayon kusi sa bata for disciplinary action.

Base sa ebidensya, si de Mira miingon nga “accountable” siya sa iyang aksyon. Kini gumikan sa kakulang niini og taas nga pasensya kay matud niya dili hustong sukaranan ang kalagot aron manapat og mga bata. (BANAT NEWS)