CEBU, Philippines - Higpit nga gipahimangnoan sa Bureau of Fisheries and Aquatic Resources (BFAR) 7 sa paglikay sa pagkaon sa mga isda ug kinhason nga makuha sa mga dapit nga naepektohan sa pagkatap sa lana o bunker oil gikan sa nalunod nga barko St. Thomas de Aquinas sa kadagatan sa dakbayan sa Talisay.
Si Director Andres Bojos sa BFAR 7 sa giluwatan niyang pahimangno iyang gipasabot nga dili lisod ang pag-ila sa isda nga nakuha gikan sa kadagatan nga nakontaminado na sa oil spill.
Matud pa ni Bojos nga dili pa sila makasulti kun hangtud kanus-a malibkas ang paglikay og kaon sa isda ug mga kinhason gikan sa kadagatan sa dakbayan sa Talisay, Cordova ug dakbayan sa Lapulapu sanglit mag-agad man kini nga mahingpit ang paglimpiyo sa kadagatan sa maong mga lugar.
Iya usab gisalikway ang kabalaka sa katawhan nga nakakaon og patay’ng lawas sa tawo ang mga isda maong dili sila mokaon og isda ning mga panahona.
Matud pang Bojos, tungod sa gilapdon sa dagat wala’y makasiguro kung unsay gilamoy sa mga isda sa dagat, tawo pa o uban pang matang sa pagkaon, apan iyang giklaro nga dili kini makadaut sa panglawas sa tawo nga makakaon.
Ang paglimpyo og maayo sa isda una pa lutoon maoy sinigurong pamaagi aron dili makakaon og hugaw ang konsumidor sumala pa ni Bojos. (BANAT NEWS)