Pag-claim sa mga lawas malangay

CEBU, Philippines - Ang Philippine National Police Crime Laboratory-7 padayon na nga mihimo og Disaster Victim Identification (DVI) sa mga patay’ng lawas nga lisod nang mailhan.

Sila ang mga biktima sa panagbangga sa duha ka barko niadtong Biyernes diin sila gikuhaan og DNA samples, fingerprints, ug dental information.

Ang mga biktima nga nagsugod na og kadugta lisod nang ilhon pa sa mga kabanay maong gigamitan sila sa maong modernong pamaagi matud pa ni medico-legal-officer, Dr. Nestor Sator.

Si Sator mibutyag nga sa DNA testing, kuhaan og femural samples ang mga patay’ng lawas nga maoy ipadala ngadto sa kauluhan alang sa DNA sampling ug profiling. Ang maong proseso molanat pa og usa ka buwan.

“This is in case cadavers will not be identified meron na tayong naka-profile na DNA that will be cross-matched to the relatives na gustong mag-claim,” matud ni Sator.

Sa pagkakaron aduna nay 63 ka mga lawas ang anaa sa Cosmopolitan Memorial Chapels ug 25 niini ang wala pa mailhi.

Si Sator midugang nga ang pagburot sa lawas sa tawo dili hinungdan sa tubig kundili tungod sa complex proteins sa lawas nga nabungkag ngadto sa simpler components ug ang gas sa lawas natipun-og sa ilawom hinungdan sa pagburot niini.

“Bodies bloated due to decomposition when gases are accumulated in the body whether in water or land ‘yun talaga when it comes to state of decomposition,” si Sator midugang.

Kagahapon naabot na sa 53 ka mga lawas ang na-examine ug ang grupo ni Sator naningkamot nga paspasan nila ang pagkuha sa DNA samples aron makuhakuhaan ang kasub-anan sa mga hingtungdan.

Samtang si Health Emergency Management Staff, Dr. Expidito Medalla, mipadayag usab dihang mibisita sa Cosmopolitan Funeral Homes nga moagi una sa tulo ka ahensya usa pa ma-claim ang mga patay’ng lawas sa mga biktima.

Kini mao ang Department of Social Welfare and Development, Scene of the Crime Operation ug National Bureau of Investigation.

Matud pa ni Medalla nga mas labing maayo og ma-identify gyud sa mga tagtungod ang mga nakalas apan gikinahanglang mag-amping aron dili laing patay’ng lawas ang ilang ma-claim.

“We are trying to avoid here spurious claimants, in cases like this there are benefits and all, we are trying to avoid na maibigay sa ibang claimants,”padayag pa ni Medalla.

Gipasabot ni Medalla sa tanang mga claimant nga dili lang unta malain sa gihimo nilang proseso tungod usab kay kaayuhan nila kining tanan.

Dugang pa ni Medalla nga sa susama niining mga panghitabo dili kalikayan nga adunay mga pekeng tawo nga magpakaaron-ingnon nga tagtungod nga ang tuyo diay mao ang makuhang benipisyo niini.

“We are not trying to hold these victims here, if ma-release natin the earliest time, it would be better. We hope that would they understand na  we are trying to do this in a process, we should be very sure. Releasing the body should be done the right way,” pasabot pa ni Medalla.

Gipadayag usab ni Medalla nga ang pipila ka mga butang nga gikinahanglan kun ugaling e-claim na ang patay’ng lawas mao lamang ang marriage contract, finger print, pictures, pipila ka dokumento nga angayan nimong ipakita aron makuha ang patay’ng lawas. (BANAT NEWS)