Mga mananagat sa Cordova suplayan og bugas

CEBU, Philippines - Ang mga mananagat  sa lungsod sa Cordova ug dakbayan sa Lapulapu apektado sa mikatap  nga oil spill  hatagan   og  bugas  sa kagamhanan.

Kini  human  si Regional Director Andres Bojos sa  Bureau of Fisheries and Aquatic Resources  (BFAR) 7   higpit nga nagpahimangno sa mga mananagat  ug manginginhas nga dili lang  una managat  og  isda ug dili  usab manginhas og kinhason tungod kay makadaut pa kini sa tawo nga makakaon niini.

Gitataw ni Director Bojos nga ang ilang buhatan sa BFAR 7  andam sa paghatag og temporary nga kapanginabuhian sa apektado  nga mga mananagat pinaagi sa pagpananom og bakhaw sa ilang kabaybayonan.

Matag  mananagat  nga  mosuway  ning  maong  trabaho  may  ikapalit  og  bugas  kay  bayran man sa ilang buhatan ang  matag punoan  nga  ikatanom.

Ang lungsod sa Cordova nga gideklarar na sa mga sakop sa konseho     nga ubos  sa  state of calamity nga  nagtugot  kang  Mayor  Adelino  Sitoy sa paggamit sa ilang salapi gikan sa calamity fund sa maong lungsod.

Si Mayor Sitoy miingon nga mokabat sa P5 milyones kapin nga calamity fund ang ilang ipagawas nga  gamiton alang sa pagpamalit og bugas  ug  ihatag ngadto  sa mga naapektohan nga mga mananagat.

Nunot usab niini si Board Member Thadeo Ouano sa ikaunom nga distrito sa lalawigan sa Sugbo miduso na  og   resolusyon sa regular session  nga nagdeklarar sa tibuok lalawigan nga  ubos  sa  state of calamity. Si Ouano sa iyang resolusyon  miingon nga makahatag kaayo og dakong kadaut sa kadagatan ang pagkaylap sa lana sa kadagatan gikan sa nalunod  nga  St. Thomas Aquinas kansang  kasko  nabuslot. Kini  human  dasmagi    M/V Sulpicio Siete   niadtong  Biyernes sa gabii. (BANAT NEWS)