Gisud sa balay ug gipatay

CEBU, Philippines - Nabulit  sa samad  sa  mga  bala  ang  lawas  patay sa  usa ka lalaki   kinsa  gipusil  sa  wala  hiilhing  kriminal  sulod sa iyang  balay  sa Sitio Taop, Brgy. Buot – Taup, dakbayan sa Sugbo   pasado alas 5:00 sa buntag  sa miaging  Lunes.

Ang biktima  giila nga si Wendell Alburo, 37, ug nagpuyo sa maong dapit.

Base sa imbestigasyon nga gipahigayon sa kapolisan sa Homicide Section  sa Cebu City  Police Office (CCPO) nasuta  nga  ang biktima naghayang   nga  wala nay kinabuhi   nga  naglunang sa  kagalingon  niining  dugo.

Nasayran  usab  nga  nabulit  sa  samad  pinusilan  ang  lawas  niini. 

Si PO1 John Errick Samosa nagkanayon nga may komosyon nga nahitabo sa  wala  pa pusila ang biktima tungod kay nagkatag  ang mga gamit sa lawak niini .

Miingon  si  PO1 Samosa  nga  natataw  nila  nga  gituyo   sa pagguba ang pultahan sa balay  sa biktima  malagmit  sa   mipatay  kaniya.

Nagkanayon  si  PO1 Samosa   nga  nakuha sa lugar  nga  nahitaboan  ang  5 ka kabhang sa  mga bala sa kalibre 45, usa ka wa matino  nga  kalibre  sa  buhing bala , suwat sa maong biktima ug ingon man ang mga personal nga dukomento niini.

Midugang  si  PO1 Samosa  nga  si Valeriano Cose Jr., 57,  panday  ug  mag-uuma,  kinsa  silingan sa biktima mitug-an  kanila   nga alas 3:00  pa  sa kaadlawon  nakadungog  siya  og  mga  buto-buto  sa armas de fuego ug  inagulo  sa tawo.

Padayon pa ang imbestigasyon nga gihimo sa kapolisan sa maong panghitabo aron sa pagsuta sa  killer  ug posibleng motibo sa pagpamusil. (BANAT NEWS)