Editor sa ABS-CBN news napusilan sa tiil

CEBU, Philippines - Naangol ang editor sa ABS-CBN news   kinsa  napagan sa pinusilay sa duha ka grupo sa mga lalaki nga nagsakay og motorsiklo  didto sa atubangan sa kanghaan sa ABS- CBN complex sa  barangay Jagobiao, dakbayan sa Mandaue sa miaging  kaadlawon.

Ang  biktima mao si Noeh Valle Bumarlong, 25, ulitawo nga taga barangay Casili, dakbayan sa Mandaue.

 Ang nagpusil  sa biktima  mao ang wala hiilhing mga lalaki nga  naggukod  sa laing tulo ka wala hiilhing lalaki nga nagsakay og motorsiklo.

Ang biktima nga nasabak  sa bitiis unang gidala sa Cortes General Hospital sa dakbayan sa  Mandaue apan  gibalhin  kini ngadto sa Chong Hua Hospital sa dakbayan sa Sugbo.

Si SPO3 Marcos Noval sa Investigation Detection and Management Bureau (IDMB) nga nahinabi sa Banat News miingon nga gikan sa barangay Pulpogan sa lungsod sa Consolacion ang ginukdanay sa duha ka grupo  diin usab unang nahitabo ang pagpamusil nga miangol sa usa ka drayber  sa habal-habal. Giila ni SPO3 Noval ang biktima sa pagpamusil sa lungsod sa Consolacion nga  si Marboy Bojos, 22 , nga taga sitio Dunggoan, sa barangay Basak, dakbayan sa Mandaue.

Matud pa ni SPO3 Noval nga si Bojos nga nakabaton og samad pinusilan sa iyang ilok unang gidala sa Evesely Child Santarium General Hospital sa barangay Jagobiao  apan gibalhin   gihapon  ngadto sa Vicento Sotto Memorial Medical Center sa dakbayan sa Sugbo.

Si SPO3 Noval miingon nga si Bojos nga ilang gisukitsukit mitug-an nga naghatod lamang kini og pasahero nga babaye ngadto sa barangay Pulpogan nga migakos kaniya samtang nagdagan ang gimaneho niyang habal-habal.

Dugang pa ni Bojos nagtuo nga gikasuyaan lamang siya sa grupo sa mga lalaki nga nag-estambay sa daplin sa karsada ug sa iyang pagbablik gikan nga naghatod sa maong  pasahero kalit lang gisugat siya sa grupo sa mga lalaki nga nagsakay og motorsiklo ug  gipusil  siya.

Si SPO3 Noval miingon nga bisan kun samdan  na  sa  ilok wala kini mohunong sa pagpadagan sa iyang motorsiklo hangtod nga nahitabo ang ginukdanay.

Dihang miabot na ang biktima sa barangay Jagobiao  nangayo dayon  kini  og panabang  sa iyang mga kauban nga  drayber .

Padayon  pa  nga  gipangita  sa kapolisan  ang  mga  kriminal. (BANAT NEWS)