Dugang unom ka patay’ng lawas nakuha

CEBU, Philippines - Dugang unom ka patay’ng lawas ang nakuha sa mga search and retrieval teams kagahapong adlawa diha sa Lawis Ledge diin maunlod ang MV Saint Thomas de Aquinas pasado alas-9 niadtong Biyernes sa gabii. Matud pa ni Lt. Col. Mark Anthony Colina ang team leader sa maong operasyon nga ilang na-recover ang mga patay’ng lawas sa usa sa mga exits sa maong barko.

Samtang atol sa gihimong press conference si Cebu Coast Guard chief Commodore William Melad mipadayag nga ilang ipadayon ang search and rescue and retrieval operation hangtod nga ilang mapalgan ang tanang pasahero nga sakay sa nalunod nga barko.

Padayag usab ni Melad nga wala sila’y gitakdang petsa kun kanus-a nila tapuson ang search and retrieval operation.

Giingong mikabat na sa 39 na ka patay’ng lawas ang nakuha gikan sa maong barko, tulo niini crew nga pulos na nailhan samtang miabot na og 645 ang na-rescue ug 106 niini ang crew.

Naglakip sa mga mitabang sa search and rescue operations mao ang nagkadaiyang grupo sa rescue teams gikan sa Philippine Air Force, Philippine National Police, Philippine Navy, Philippine Coastguard ug kagamhanan sa Talisay pinaagi sa ilang Fishermen Sea and Ecological Care (FISECA). (BANAT NEWS)