Local divers gipadaplin

CEBU, Philippines - Nasagmuyo ang mga local divers human giingong wala na patabanga pa sa nagpadayong search and retrieval operation kagahapon sa Lawis Ledge, syudad sa Talisay diin nalunod ang usa ka barko ug dul-an na  40 ka kinabuhi ang nakalas. Ang mga 30 ka volunteer divers sa nagkalain-laing lokal scuba diving groups ang nagpaabot tibuok adlaw sa go signal sa Philippine Coast Guard (PCG)  aron sila motabang sa mga technical divers sa pagkuha sa mga patay’ng lawas sa nalunod nga barko, apan wala kini mahitabo. Si Alfie Fernandez, ang vice president sa Sea Knights, nagkanayon na ni-pullout na lang sila alas-3 kagahapon sa hapon kay samot di na sila maka-dive kay kusog na ang bawod tungod sa naglain na nga panahon.

Si Fernandez nagkanayon nga ilang gitahod nga ang PCG ug Philippine Navy gyud ang official divers sa retrieval operation, apan tugtan lang sad unta sila nga makatabang kay gawas sa boluntaryo kini, naglaom sad sila nga daghan pang patayng lawas nga maugkat kay daghan pang kabanay ang nagpaabot.

“They were categorizing qualified divers kuno na maka-dive. If we’re not allowed to get inside the ship, ang amo lang, if naa sila’y ma-retrieve, ari na lang mi sa mabaw na part unya sugaton na lang namo ang body bag unya kami na magdala sa surface para di na sila magbalik-balik sa ibabaw,” asoy pa ni Fernandez, kinsa 20 na ka-tuig nga diver. Ang ubang divers kagahapon gikan sa Aquanauts Cebu, MS Boats, ug PCG Auxiliary. Si Commodore William Melad, ang district commander sa PCG, nagkanayon na duna nay mga 16 ka technical divers nga maoy mopahigayon sa retrieval operations ug paigo na kini kay di sab maayo nga daghang divers ang magdungan tanan og dive.

“Very dangerous din sa ilalim. Hindi naman sa minamaliit natin sila, but while they were divers, baka ma-endanger pa ang iba saka marami na ring divers kanina. They’re controlling it for safety not for the efficiency (of divers),” matud pa ni Melad. Mapasalamaton hinuon si Melad sa boluntarismo sa mga local divers ug iya gi-welcome ang pagtabang nila hangtod nga mahuman ang retrieval operations. (BANAT NEWS)