Driver giluba angol sa carnapper

CEBU, Philippines - Naangol ang usa ka driver  sa  habal-habal  human kini dunggaba sa duha ka  construction worker sa dalan St. Anthony, barangay Talamban dakbayan sa Sugbo  sa miaging  gabii.

Giila ang biktima  nga  si Demetrio Ouano, 24, nagpuyo sa Sitio Kadaugan, Barangay Talamban, dakbayan sa Sugbo  ug  driver  sa habal-habal  ang  trabaho.

Samtang ang  giilang  mga  suspek mao sila si Santos Ribucas, 30, ug Vicente Rabanes, 22, mga construction worker,  kinsa pulos lumad nga taga Tubod,Sibonga dakbayan sa Sugbo.

Si Demetrio  mibutyag  sa kapolisan  nga nagmaneho  siya sa iyang  motorsiklo nga iyang  inabangan  unya  misakay  kaniya  si Ribucas  ug Rabanes paingon  sa  Casa Del Rio.  Apan  paghiabot  nila  sa sitio Kadaugan   kalit  nga  gilanit  ni  Ribucas  ang  iyang  kutsilyo  dayon  giluba  siya  makaduha.

Una  naigo  ang  tuo nga bahin  sa iyang liog   ug ika-duha  sa iyang  nawong.

Gumikan  kay  nawad-an  siya  sa  maayong  hunahuna  nabuhian  niya  ang  manobela  sa motor  ug  nangatumba  sila  sa daplin  sa karsada.

 Matud  pa  ni Demetrio  nga  gitabangan  nila  ni Ribucas  ug Rabanes  pagkuha  ang  iyang  motorsiklo  apan  misukol  pa  ang  biktima  aron  nga  dili  ma-carnap  sa duha  ang  iyang  sakyanan.

Bisan  kun  samaran  misinggit   siya  og  tabang  sa  mga  molupyo  sa maong  lugar  busa  nanagan  ang  duha  ka suspek.

Mipauli  ang  biktima  ug  ang  iya  na  nga  inahan  maoy mihatud  kaniya ngadto  sa Cebu City  Medical  Center (CCMC).

Samtang  didto  siya  sa tambalanan,  pipila  ka takna  nahiabot  ang  mga  tanod  sa Talamban  nga  gipangulohan  ni  Felix Sanoria nga  nagdala  sa mga suspetsado  ug  gipaila  kaniya.

Dihang  positibo  kining  giila  sa biktima,  gihatud  dayon  og  balik  ngadto  sa prisohan  sa Talamban  Police  Station  diin  tua  pakagulkola  karon  samtang  gisang-at  ang  kaso  nga attempted murder  ug attempted carnapping.  (BANAT NEWS)