Lima ka tawo nasikop sa buybust sa PRO-7

CEBU, Philippines - Nagtingkagol sa karsel ang lima ka lalaki human kini masikop atol sa gipahigayong buybust operation sa mga sakop sa Regional Anti-Illegal Drugs Special Operations Task group pasado alas 6 sa miaging gabii diha sa barangay Poblacion dakbayan sa Danao.

Ang mga nasikop mao silang Reyan Mansueto, Jestoni G. Ramos, Jeffrey Ramos, Noel Cal ug Virgilio Dagatan pulos molupyo sa dalan Olaivar sa maong barangay.

Subject sa maong operasyon mao si Mansueto nga giingong maoy tigpamaligya og ginadiling drugas sa dapit.

Si Sr. Insp. Henrix Bancoleta, pangulo sa raiding team miingon nga nadawat nila ang impormasyon bahin sa pagpamaligya og shabu sa suspek hinungdan nga ila kining gipanid-an.

Huwebes sa gabii dihang ilang gilusad ang buybust operation nga miresulta sa pagkasikop ni Mansueto dihang giingong gidawat niya ang usa ka libo ka pesos nga kantidad sa gituohang shabu.

Ang bata-bata ni Mansueto nga si Jestoni giingong maoy mitunol sa shabu ngadto sa posuer buyer maong apil kini sa gidakop ug laing tulo pa nila ka kauban nga nanuyop.

Narekober sa kapolisan ang tulo ka dagkong pakete sa gituohang shabu, laing duha ka medium packs ug duha ka gagmay nga gibana-banang mobalor og kapin kon kulang P400 mil.

Gawas niini, nakuha usab gikan kang Jestoni ang  usa ka kalibre .38 ug di mominos P2 mil  nga gituohang halin sa ginadiling drugas.

Si Mansueto kusganong mihimakak sa pasangil sa kapolisan samtang gihimakak usab sa managsuong Ramos nga nanuyop sila tungod kay mibisita lang sila sa maong lugar. (/EIM) (BANAT NEWS)