Linya sa kuryente sa 3,000 ka panimalay nabalik na

CEBU, Philippines - Gikatakda kagahapon sa alas 5:00 sa hapon ang pagkabalik na sa mga linya sa kuryente diha sa mga bukirang barangay sa dakbayan sa Talisay.

Kahinumduman nga gibana-banang 3,000 ka mga panimalay diha sa Lagtang, Camp 4,  Manipis ug Jaclupan human ang tulo ka poste sa main line sa kuryente nga nahimutang diha sa sitio Tangub, Lagtang natumba tungod sa pagdahili sa yuta niadtong Miyerkules sa buntag.

Diha sa maong lugar ang padayong pagpangubkub sa bukid alang sa pagpalapad sa karsada. Kahinumduman nga diha sa barangay Lagtang paingon ngadto sa mga bukirang barangay sa Talisay gipahigayon ang pagpalapad sa karsada alang sa “Talisay-Toledo wharf-road”.

Si Talisay City Mayor Johnny De los Reyes nagkanayon kini nga ang QM Builder nga maoy contractor sa proyekto naninguha og contact sa Visayan Electric Company (VECO) aron mapabarog ang mga poste ug mabalik dayon ang linya sa kuryente.

Matud ni De los Reyes nga kagahapon sa buntag dunay mianha sa iyang buhatan nga taga QM Builder nagpahibawo nga kagahapon sa alas 5:00 sa hapon gikatakdang mabalik ang linya sa kuryente.

Sa laing bahin, kahinumduman nga ang mayor niadtong Miyerkules mipatawag og tigom tali sa QM Builder, Provincial Environment and Natural Resources (PENRO), Department of Environment and Natural Resources (DENR) ug Department of Public Works and Highways (DPWH) diin ilang gituki ang kabahin sa nahisgutang proyekto kung kanus-a kini matapos.

Ang mga tawo diha sa barangay Lagtang nagreklamo na kini sa lapok sa karsada panahon sa uwan ug abog usab kaayo kini panahon sa ting-init tungod sa pagpunay og kubkob diha sa bukid sa pagpalapad sa dalan.

Gawas niini ang QM Builder giingong namaligya kini  og mga anapog nga walay permit gikan sa siyudad ug PENRO.

Gibutyag sa mayor nga ang QM Builder misaad nga karong Septiyembre 11, 2013 matapos ang proyekto apan matud ni De los Reyes aron dili maalang-alang ang maong contractor gihatagan niya kini og lugway sa pagtapos sa proyekto hangtud sa Septiyembre 30, 2013.

Gawas niini ang siyudad mohatag na usab og permit sa pagpamaligya og anapog sa QM Builder.

Ang siyudad makakuha og dugang kita kung ang maong contractor mokuha og permit. Apan ang mayor mibahad nga kung dili makatuman sa gikatakdang adlaw ang QM Builder sa pagtapos sa proyekto ipahunong gyud niya kini. (Brenda D. Batuto/EIM)

Illegal fishers wala pamultaha apan

gipasemento sa city hall sa Talisay

Upat ka mga tawo usa niini menor de edad kinsa nagpahigayon og ilegal nga panagat diha sa kadagatan sa barangay Cansojong, dakbayan sa Talisay ang nasikop kagahapon sayo sa buntag sa mga sakop sa Fishermen Sea and Ecological Care (FISECA).

Ang mga nasikop mao sila si Julius Seguerra, 33, Dante Basalo, 36, Dexter Basalo ug ang 17-anyos nga bayong-bayong, parehong mga residente sa barangay Biasong, dakbayan sa Talisay. Ang maong mga suspetsado gipresentar kini kagahapon sa buntag ngadto kang Mayor Johnny De los Reyes.

Giingong ang mga suspetsado nanagat kini gamit nga pino nga pukot diin lakip nga makuha ang mga gagmay kaayong isda ug gidili kini tungod kay makapuo kini sa mga isda.

Naembargo gikan sa mga suspetsado ang 10 ka kilong klase-klaseng isda, pukot nga ilang gigamit ug ang pumpboat.

Ang mga suspetsado makamulta unta kini og P3,000 matag usa tungod sa kalapasan nila sa ordinansa sa siyudad.

Apan tungod kay walay ikabayad gipatabang sila og pasemento diha sa karsada sa likod sa city hall isip community service.

Apan ang menor de edad igo lang kining tig-tunol og tubig ug ang mga isda lakip na ang ilang pukot ug sakayan gibalik kini sa mayor apan gipapirma sila nga dili na mousab sa ilang gibuhat.

Si De los Reyes mitigom sa mananagat sa siyudad ug gipasidan-an nga dili mogamit og ilegal nga panagat. (/EIM) (BANAT NEWS)