Bigtime pusher mipasangil nga gipik-ap siya sa PDEA ug di sa buybust

CEBU, Philippines - Nabitik sa pukot sa mga sakop sa Philippine Drug Enforcement Agency PDEA-7 ang giingong usa sa mga big time drug pusher nga naglihok sa syudad sa Sugbo.

Pasado alas-10 sa miaging gabii, nasikop sa maong grupo si Charlie Parba, 34, kinsa usa sa gihulagway’ng bigtime drug pusher diha sa Sitio Mangga barangay Tisa.

Si PDEA-7 Regional Director Julius Navales mipadayag nga dugay na silang naghupo-hupo kang Parba hangtod nga ila na gyud kining nataymingan sa miaging gabii.

Ang maong grupo mipahigayon og buybust operation diin ilang gipalitan si Parba og gituohang shabu nga mobalor og P19 mil  ug sa dihang midawat na si Parba sa boodle money didto na usab gisikop si Parba.

Matud pang Navales makapagawas ang suspek og di mominos napulo ka dagkong pakete sa gituohang shabu kada semana diha sa nahisgutang barangay.

Gipadayag usab ni Navales nga anaa sa ilang drug watchlist si Parba nga ilang gibutang sa level 2 drug pusher.

Atol sa maong operasyon narekober sa mga sakop sa PDEA-7 ang napulo ka mga dagkong pakete sa gituohang shabu nga mobalor og di mominos P250 mil.

Samtang si Parba sa iyang habig mipadayag usab nga wala siya madakpi sa mga sakop sa PDEA-7 kay gi-pickup siya sa ilang panimalay sa barangay Tejero ug gidala sa ilang panimalay diha sa barangay Tisa. Nakugang na lang siya dihang gikatahong aduna nay gilatag nga napulo ka pakete sa gituohang shabu sa ilang panimalay nga gipasangil nga iyaha.

Wala hinoon gihimakak ni Parba nga mamaligya siya og shabu. Apan si Navales miingon nga lehitimo ang ilang operasyon kay taud-taud na usab silang nag-surveillance ni Parba. (/EIM) (BANAT NEWS)