Pagpahubo sa sapatos sa pasahero sa MCIA gilibkas

CEBU, Philippines - Gilibkas na  kagahapon ang  mando  sa pagpahubo sa sapatos sa  mga  biyahedor sa mga departure area sa Mactan Cebu International Airport (MCIA).

Matud pa ni Alona Hayag sa Office of the Transportation Security(OTS) sa MCIA nga pormal nilang gilibkas ang maong  kamanduan  sa tanang moagi sa Domestic ug International departure areas.

Matud pa ni Hayag  nga kini  tungod  kay  linaw na ang kahimtang sa Sugbo bahin  sa hulga sa seguridad hinungdan nga ila  kining gilibkas.

Gipasabot ni Hayag nga kini aron  nga  di  mahasol  ang  mga  pasahero apan  padayon sa  gihapon  ang ilang 100% nga  pag-inspection sa tanang pasahero nga moagi sa tugpahanan.

Ang subli  nga paghangyo  sa publiko  ilang gihimo  aron  mosabot  sa ilang  pamaagi  karon.

Subling giimplementar sa MCIA ang pagpahubo sa sapatos sa mga mosud sa departure area niadtong Agusto 8 ning tuiga human ipaubos sa PCAS 7 sa Security Condition 2 ang MCIA gumikan sa hulga sa pagpamomba sa Mindanao ug dinhi sa Sugbo.

Gumikan niini miani  sa kahasol ug gisaway sa mga pasahero ang maong kamanduan. (BANAT NEWS)