Tigpayuhot og mini nga kuwarta tiklo

CEBU, Philippines - Natanggong sa prisohan ang duha ka gidudahan nga tigpayuhot og  mini  nga  kuwarta  human niini suwayi og palusot ang gamay’ng tindahan didto sa Brgy. Poblacion Compostela sa milabay  nga  Martes  sa kaadlawon.

Ang  mga  suspetsado  nailhan  sa kapolisan  nga  sila  si Ramil Rocha, 37,  lumad  nga  taga  lungsod  sa Dumanjog, apan  nagpuyo  sa Villagonzalo, ug Glizel Regis, 25, nga taga sitio Mangga, barangay  Punta Princesa, pulos sa  dakbayan  sa Sugbo.

Samtang  ang mga biktima naila  usab  nga sila Lyn Taperla, 38 anyos, tag-iya sa maong tindahan nga  nahimutang  sa  Enero St., Brgy. Poblacion, Compostela ug si Matias Juntilla, 38, usa ka ballot vendor,  nga taga Brgy. Magay, lungsod sa Compostela.

Si SPO3 Ernesto Pepito Jr. sa Compostela Police Station nagkanayon nga gisulayan pagbayad  sa duha ka suspetsado og P500 nga fake money sa  ilang  gipalit  nga  sigarilyo ang tindahan nga gipanag-iya ni Taperla.

Tungod  kay  kadudahan ang  hulagway sa kwarta, gisusi  kini og maayo sa biktima ug didto nasuta nga  mini  ang  maong  salapi.

Samtang  si Juntilla  kinsa mas  una  pa  nga  nailad kang Taperla  positibo niyang giila ang mga suspetsado.

Dali nga mitawag  og  kapolisan ang mga biktima ug nasikop dayon ang  mga suspetsado.

Si SPO3 Pepito midugang nga ubay-ubay   na  ang nabiktima niining maong modus  ug ang  mga  suspetsado ila na nga gipasakaan og kaso.

Kalapasan  sa  Art. 168 of  revise penal code in relation to Art. 166 (illegal possession and use of false treasury of fake peso bill) ang ilang  gipasaka  nga  kaso  didto sa syudad sa Mandaue.  (BANAT NEWS)