Tiggama og paltik nga armas de fuego dakpan

CEBU, Philippines - Nasikop ang usa ka ilegal nga tiggama og armas  de fuego human siya masakmiti og kapin P1 milyon  nga balor sa mga ekipo sa  buy-bust operation didto sa Barangay Suba, Danao City  sa miaging Domingo. Ang nasikop  sa  mga operatiba sa Regional Special Operations Group (RSOG) 7 mao  si  Manuel Tuñacao kinsa napakyas sa pagpakita og mga dokumento nga  magpamatuod  nga  legal ang iyang pagpanggama  og  mga armas.

Ang  operasyon  gihimo sa  alas 11:00  sa buntag   diin duha ka polis ang nagsilbi  nga  poseur-buyer  kinsa  mipalit kang Tuñacao og 10  ka cylinder alang  sa kalibre .38 nga revolver ug 10 ka barrel sa kalibre .45 nga pistola nga ang  tanan mikabat  og P2,000. Human madawat sa suspek ang kuwarta, gisinyasan  dayon  sa poseur buyer  ang  iyang  mga  kauban  hinungdan  nga  gisikop  dayon  ang  suspetsado.

 Ang kapolisan gipangulohan ni Insp. Romeo Sentinta, Jr.  misakmit sa mga ekipo  nga  gamiton  sa  paggama  og  mga  armas  de fuego nga ilang nakit-an sa sulod  sa  lawak  sa suspek.  Kini  naglakip  sa lathe machines, hydraulic presser, metal grinder, electric welding machine, cross vise, bench drill, ug duha ka sako sa mga nagkalainlaing  mga  galamiton.

Nasakmit usab ang 138 ka barrel, mga cylinder ug pinugtol  na  nga  mga  puthaw  para sa nagka-lainlaing kalibre sa mga armas. Ang mga nasakmit nga ebedinsya mobalor og kapin sa P1 milyon, matud  pa  sa hepe sa Firearms and Explosives Section nga si Senior Supt. Rex Derilo. Gidala ang suspek sa opisina sa RSOG 7 diin  adto  unta  siya itanggong apan  nakabayad  kuno  kini  og piyansa  sa miaging Martes.      

Matud pa   ni Derilo,  nga  si Tuñacao misuway pag-apply og lisensya sa  miaging tuig apan wala na kini mobalik. 

Si Chief Supt. Generoso Cerbo, Deputy Regional Director for Administration sa Police Regional Office (DRDA-PRO) 7, nagkanayon na ang pagkasakmit sa maong mga ekipo  mopakunhod  sa mga loose firearms. Mga usa ka-gatos ka armas unta, matud pa, ang mahimo gikan sa mga nasakmit nga piyesa  sa armas, matud pa  ni Cerbo. “Na-prevent ang possible crime with this accomplishment,” si Cerbo nagkanayon.

Siya mipasalig   nga padayon silang manakop sa mga illegal gun manufacturer ilabina sa syudad sa Danao diin gikonsiderar nga gun-making capital sa Central Visayas.  (BANAT NEWS)