Mayor John O mi-death threat og huwes?

CEBU, Philippines - Gipasaka ni Toledo City Regional Trial Court (RTC) Branch 59 executive judge Hermes Montero ngadto sa Korte Suprema ang daghang hulga sa iyang kinabuhi diin ang labing ulahi niini iya ni Mayor John Henry “Sonny” Osmeña.

Sa suwat ni Montero kang SC Administrator Jose Midas Marquez, iyang gipahibawo nga ang mga hulga nagsugod human  nga iyang gikombikto si Ricardo Rafols Jr. og 40 ka tuig nga pagkabilanggo niadtong Agosto 9, 2012.

Kaalyado ni Osmeña si Rafols  nga midaug isip konsehal sa niaging eleksiyon apan namatay sa sakit samtang gitanggong sa National Penitentiary sa kaulohan niadtong Hulyo 11. Human sa flag-raising ceremony sa Toledo City Hall niadtong Hulyo 15, 2013, si Osmeña giingong niluwat og pamahayag atubangan sa publiko nga si Rafols biktima sa inhustisya ug may adlaw ra si Montero.

Giangkon ni Osmeña nga nakalitok siya nga “may oras ka ra” apan wala kini nagpasabot og bahad kang Montero.

“I did not say anything was going to happen to him but ang Ginoo ra’y mahibawo,” matud pang Osmeña.

Apan si Montero miingon nga daghang kahulogan ang maong pamahayag labi pa nga makadaut kini sa imahen sa hudikatura.

Matud pa ni Montero gikan pa gyud sa respetadong mayor ug kanhi senador ang maong pulong. Si Osmeña miingon nga dili na angayan magpalaban si Montero sa Korte Suprema ug maayo pa niini nga moretiro na lang o magpabalhin og lugar.

“Nganong palaban man siya sa Supreme Court nga wa man siya giakusar of anything. Mas maayo unta to mo-retire ug mobalhin og lain,” sumala pa sa mayor. Si Montero nakadawat usab og suwat sa usa ka Regino Blanco Rafols nga nagpailang igsoon ni Ricardo human sa hukom sa korte.

Gitawag si Montero nga “Mr. Injustice” sa maong suwat nga nagkanayun, “Wala ko kaila nimo personal apan nakakita ko sa imong panagway nga mora og tarong apan lawum og dulot.”  (BANAT NEWS)