Text message nakapahikog sa bana

CEBU, Philippines - Tungod  kay giselosan  sa asawa naghikog  ang  usa  ka  mag-uuma  pinaagi  sa  pagluthang  sa   kaugalingon  nga  nakapabungkag  sa dughan niini  sulod  sa ilang  payag  sa Barangay Kabkaban, lungsod  sa Barili  kagahapon  sa alas 6:00  sa buntag.

Ang naghikog giila nga si Edwin Orotko, 49, minyo, mag-uuma, ug nagpuyo sa Barangay Kabkaban, Barili.

Si PO2  Jervy Tinago,  sa Barili  Police  Station  mibutyag sa   Banat News  nga sayo  niini  ang  biktima  ug  ang  iyang  asawa  nga  si Bernadette Orotko  naglalis  niadtong  Martes  sa gabii.

Kini  human  hibasahi  sa  asawa    ang  mga  text  messages  sa  cell phone  sa biktima. Gumikan  niini  nananghid  ang  biktima  nga   moadto  sa ilang  payag,  pipila  ka  metros  gikan  sa ilang  balay.

Nianang  alas  9:00 sa gabii, nakadungog si Bernadette og buto  sa armas  de fuego apan wala  niya  kini  panumbalinga.

Kagahapon  sa alas 6:05  sa buntag  dihang  manlawog  na  unta  si Bernadette  sa  ilang  mga  baboy  sa  ilang  payag,  nakurat  kini  dihang  nakita  niya  nga wala nay  kinabuhi  ang  iyang  bana nga  nagbay-ad  sa sawog  kansang  lawas  naglunang  sa kaugalingon  niining  dugo.

Guba  na  ang  dughan  niini nga  naigo  sa bala  sa armas  nga .38 kalibre  nga  may suicide  note  usab  nga  nagkanayon, “Pasayloa ko ninyo mga anak aning akong buhaton kay walay manubag niini, ako ning gusto”. Dayon sa ubos nga bahin sa iyang note,nakasulat ang mga ngalan sa iyang mga anak,mao kini sila Princess, Jay-Ann ug Ar-Ar.

Napunitan  sa  kapolisan    ang  revolver   nga  may  tulo  pa ka  buhing  bala  nga  nahibilin  ug  usa  ka  kabhang   sa kilid  sa biktima.

Gimando  sa kapolisan  nga  ipa-autopsy  ang  maong  patay’ng  lawas  sa naghikog. (BANAT NEWS)