DENR ug 9 ka ahensya magtinabangay alang sa mga kabus

CEBU, Philippines - Ang Department of Environment and Natural Resources (DENR) ug laing siyam (9) ka mga ahensya sa gobyerno magtambayayong pagpatuman sa ilang mga programa pagpauswag sa kahimtang sa mga kabus sa katilingban.

Usa ka pormal nga pagpinirmahay sa Memorandum of Understanding (MOU) ang gipahigayon sa mga opisyales sa DENR, DA, DAR, DOH, DILG, DOST, DSWD, DOT ug DTI alang sa pagpatuman niini.

Sumala pa ni DENR Secretary Ramon J.P. Paje nga ang maong kasabutan mohimo og mga serbisyong mopauswag sa panginabuhi sa mga kabus, paghatag og mga trabaho, igong pagkaon, ug alang  sa luwas ug limpyo nga kalikopan.

Ubos sa National Greening Program nga  pagpananom  sa mga kahoy  sa 1.5 milyon ka ektaryang yuta sulod sa unom ka tuig, ipatuman niini ang site identification & development, seedling production & plant propagation, pagsagop  sa  mga  teknolohiya  nga mahigalaon  sa kalikopan, provision alang  sa mga material nga igtatanom, technical assistance ug monitoring   ug evaluation.  Ang buhatan sa Agrikultura (DA) mopatuman usab sa Agri-Pinoy program samtang ang DAR adunay Program Beneficiaries Development.

Ang DILG usab mopatuman sa Enhancing Economic Growth & Competitiveness of local government units, ug ang DOLE sa programang Integrated Livelihood towards Community Enterprises Development. 

Ang DOST sa ilang bahin mopaambit sa  programa nga Small Enterprises Technology Upgrading Program ug sustainable livelihood pinaagi sa micro-enterprise development.

Sa bahin sa DSWD adunay programa nga Employment Facilitation Track ug ang National Industry Cluster Capacity Enhancement Project.

Pinaagi sa Food & Drug Administration, ang DOH mopasiguro sa luwas, epektibo ug de kalidad nga mga  produkto sa mga balay patigayon.

Ang DOT gitahasan usab paghimo og mga training modules alang sa pagpahigayon og mga programa nga makapatugbaw sa kalidad sa serbisyong pang turismo.

Kini nga MOU usa sa mga paningkamot sa pamunoan ni Presidente Benigno Aquino lll nga gitawag og "social contract" sa katawhang Pilipino aron mamenosan ang ka pobrehon pinaagi sa paghatag og kahigayonan nga mapalambo ang community based enterprises alang sa food security program ug pagpalambo sa atong ekonomiya. (BANAT NEWS)